Qyzylordada bir kúnde 60 otbasy úıli boldy
QYZYLORDA. KAZINFORM — Amal kúninde qyzylordalyq 60 otbasy qonys toıyn toılady.
Oblys ákimi Nurlybek Nálibaev keshe jańa qonys ıelerine Qyzylorda qalasyndaǵy 60 páterlik turǵyn úıdiń kiltin tabystady. Aımaq basshysy olardy Amal kúnimen jáne aldaǵy Naýryz meıramymen quttyqtap, óńirdegi aýqymdy jobalarǵa toqtalyp ótti.
— Memleket basshysy Qasym-Jomart Kemeluly halyqty turǵyn úımen qamtamasyz etý memlekettiń áleýmettik saıasatynyń basym baǵyty ekenin atap ótti. Prezıdentimizdiń, Úkimettiń erekshe qoldaýynyń arqasynda búginde oblysymyzdyń bıýdjeti 750 mlrd teńgege jetti. Ózderińiz bilesizder, osydan úsh jyldaı ýaqyt buryn aımaq bıýdjeti 364 mlrd teńge bolatyn. Ósim 206 paıyzdy qurady. Bul qomaqty qarajat aımaqtaǵy eń ózekti degen máselelerdi sheshýge, turǵyndardyń ómir súrý sapasyn jaqsartýǵa jáne aýqymdy ınfraqurylymdyq jobalardy iske asyrýǵa jumsalýda. Memlekettiń qoldaýyn sezinip, baspanaly bolýǵa nıet etken árbir otbasy úshin búgin aıtýly kún! Baspanaly bolý otbasyn, ásirese, balalardy qýanyshqa keneltedi. Qonys toılaryńyz qutty bolsyn!, — dedi oblys ákimi.
Al biz buǵan deıin bıyl elimizde rekordtyq kólemde turǵyn úı paıdalanýǵa beriletinin aıtqanbyz.