Qyzylordada bir kúnde 11 eldi mekenniń ákimi saılandy
QYZYLORDA. KAZINFORM — Keshe Qyzylorda oblysy boıynsha 1 kent jáne 10 aýyldyq okrýgte ákimder saılaýy ótti.
Atap aıtqanda, saıası naýqan Qyzylorda qalasyndaǵy Qosshyńyraý aýyldyq okrýginde, Aral aýdanyndaǵy Aralqum jáne Bekbaýyl, Qarmaqshy aýdanyndaǵy Jańajol, Syrdarııa aýdanyndaǵy S. Seıfýllın, Shıeli aýdanyndaǵy Báıgequm, Jańaqorǵan aýdanyndaǵy Jańaqorǵan kenti, Aqqorǵan, Ózgent, Ekpindi, Qosúıeńki aýyldyq okrýgterinde boldy.
— 11 okrýgte 20381 saılaýshy daýys berdi. Jańaqorǵan kenti jáne 10 aýyldyq okrýg boıynsha 32 kandıdat saılaý bıýlletenine engizildi. Kandıdattardyń altaýy saıası partııadan usynylsa, 26-sy ózin-ózi usynǵan. Saılaý kúni 253 saılaýshy tasymaldanatyn jáshik arqyly úıden daýys berdi. Saılaý zań talaptaryna saı uıymdastyryldy, — dedi Qyzylorda oblystyq saılaý komıssııasynyń tóraǵasy Ádilbek Ersultanov.
Daýys berý qorytyndysymen saılaýshylardyń basym daýysyn alǵan Seıdýáli Ábdiqadyrov Qosshyńyraý aýldyq okrýginiń ákimi, Álimjan Seıitov Bekbaýyl aýyldyq okrýginiń ákimi, Jubatqan Ábdiqalyqov Aralqum aýyldyq okrýginiń ákimi, Ábımúsilim Qoqanov Jańajol aýyldyq okrýginiń ákimi, Bekzat Qydyrbaev S. Seıfýllın aýyldyq okrýginiń ákimi, Dáýlet Ábjapbarov Báıgequm aýyldyq okrýginiń ákimi, Jasulan Beısenbekov Jańaqorǵan kentiniń ákimi, Serik Týǵanbaev Aqqorǵan aýyldyq okrýginiń ákimi, Álimhan Ahtaev Qosúıeńki aýyldyq okrýginiń ákimi, Qaırat Qojamjarov Ekpindi aýyldyq okrýginiń, Erkebulan Jakýdaev Ózgent aýyldyq okrýginiń ákimi bolyp saılandy.
Saılanǵan ákimderdiń eń jasy — 30 jasta, eń úlkeni — 59-da.
Aıta keteıik, oblystaǵy 146 ákimniń 3-i — áıel, 143-i — er adam.
27 sáýirde Qyzylorda oblysyndaǵy 5 aýyldyq okrýgte ákim saılaýy ótedi.
Prezıdent pármenimen aýyl ákimderin tikeleı saılaý tetigi engizilgen ýaqyttan beri Qyzylorda oblysyndaǵy barlyq 146 ákim halyq tańdaýy arqyly saılandy.
Óńirde jyl basynan beri 7 aýyldyq okrýg ákiminiń saılaýy uıymdastyryldy.
Qyzylorda oblysynda buǵan deıin de ótken kent jáne aýyldyq okrýgterdegi ákim saılaýy týraly jazǵanbyz.