Qyzylordada bıyl 15 bala terezeden qulap ketti
QYZYLORDA. KAZINFORM - Qyzylorda oblysynda bıyl balalardyń terezeden qulaýy boıynsha 15 derek tirkeldi.
Olardyń barlyǵy Qyzylorda qalasynda tirkelgen. Barlyǵy aman, túrli dene jaraqatyn alǵan.
Oblystyq Tótenshe jaǵdaılar departamentiniń málimeti boıynsha, balalardyń terezeden qulaý jaǵdaıynyń basty sebebi – ata-analardyń balalardy baqylaýsyz qaldyrýy.
Osyndaı oqıǵanyń biri Qyzylorda qalasyndaǵy kóp qabatty úılerdiń birinde bolǵan. Tórtinshi qabattyń terezesinen tórt jastaǵy er bala qulap ketken. Ol ártúrli jaraqatpen oblystyq balalar aýrýhanasyna jatqyzylǵan.
«Terezede ýaqytsha bekitkish tordyń bolmaýy men moskıt torynyń berik bekitilmeýi oqys oqıǵanyń tirkelýine alyp keledi. Oǵan qosa balalardyń terezeniń aldynda oınaýyna jol bermeý qajet», - dep málim etti Qyzylorda oblystyq tótenshe jaǵdaılar departamentinen.
Bul baǵytta sala mamandary qaýipsizdik sharalaryna baılanysty úgit-nasıhat jumystaryn júrgizip keledi.
Byltyr dál osyndaı 14 derek tirkelgen edi.
