Qyzylordada asa iri mólsherde esirtki saqtaǵan turǵyn ustaldy

QYZYLORDA. KAZINFORM – Esirtkini satý úshin asa iri mólsherde zańsyz saqtaǵan Qyzylorda qalasynyń 34 jastaǵy turǵyny ustaldy.

Bul baǵytta Qyzylorda oblysy polıtsııa departamentiniń Esirtki bıznesine qarsy kúres basqarmasynyń qyzmetkerleri jedel-izdestirý sharalaryn júrgizdi.

«Nátıjesinde Qyzylorda qalasynyń 34 jastaǵy turǵyny esirtki zatyn satý úshin asa iri mólsherde zańsyz saqtaǵany belgili boldy. Saraptama qorytyndysymen tárkilengen zattyń salmaǵy 261 gr. boldy jáne ol «a-PVP» psıhotroptyq zattarǵa jatatyny anyqtaldy. Kúdikti ýaqytsha ustaý ızolıatoryna oqshaýlandyryldy, tergeý jalǵasýda. Qazaqstan Respýblıkasy Qylmystyq protsestik kodeksiniń 201-babyna sáıkes ózge aqparattar jarııa etilmeıdi», - dep málim etti Qyzylorda oblystyq polıtsııa departamentinen.

Eske salsaq, budan buryn Qyzylorda oblysynda jergilikti turǵynnan asa iri mólsherde esirtki tabyldy.