Qyzylordada alaıaqtyq isi boıynsha 432 kúmándi esepshot buǵattaldy
QYZYLORDA. KAZINFORM – Bıyl 9 aıda Qyzylorda oblysynda alaıaqtyq isteri boıynsha 389 dropper anyqtalyp, 240 dropperge qatysty sotqa deıingi shaǵym tústi.
Oblystyq prokýratýra Qylmystyq protsessýaldy kodekstiń 200-babyna sáıkes 255 jábirlenýshiniń 270 mln teńgege jýyq nesıe tólemin protsestik sheshim qabyldanǵansha toqtatýdy usyndy.
- Antıfrod ortalyǵyna kúmándi esepshot tranzaktsııalaryn buǵattaý úshin 454 ıntsıdent berilip, nátıjesinde 432 esepshot buǵattaldy. 17 esepshot boıynsha jábirlenýshilerge tıesili 6 mln 890 myń teńgege jýyq qarjy ustalyp qaldy, - dedi oblys prokýrory Rızabeke Ojarov.
Internet alaıaqtarmen kúreste «Kıberpol» jumysy altyn saǵat prıntsıpi negizinde qaıta jandandy. Bul jábirlenýshilerdiń aryzyn qabyldap, jedel tergeý amalyn júrgizýde tıimdiligin kórsetip otyr.
- Nátıjesinde kópepızodty alaıaqtyqpen aınalysty degen kúdikpen 3 adamǵa qatysty tergeý aıaqtaldy. Qylmystyq is endi sotqa joldanady. Alaıaqtar túrli aıla-amaldy qoldanyp, senimdi teris maqsatqa paıdalaný arqyly tabysqa jetkisi keledi. Sondyqtan jeke derekterińizdi, onyń ishinde JSN, bank kartasynyń nómirlerin, telefonyńyzǵa kelgen SMS kodttardy eshkimge bermeýdi suraımyz, - dedi oblys prokýrory.
Qadaǵalaýshy sala ókilderi qaýipsizdik úshin taýardy tek resmı saıttardan satyp alýǵa, satyp almas buryn tólem jasamaýǵa, kúmán týdyratyn habarlamalar men qońyrlaýdy buǵattaýǵa keńes beredi.
Buǵan deıin Almaty qalasynyń polıtsııa departamenti turǵyndarǵa ınternet-alaıaqtyqtyń jańa túri paıda bolǵanyn eskertken edi.