Qyzylordada 5 jyldan keıin sý tarıfi kóterildi

QYZYLORDA. KAZINFORM – Qyzylorda qalasy boıynsha sýdyń ortasha táýliktik óndirisi — 91,2 myń m³. Jazda bul kórsetkish tipti artady. «Qyzylorda sý júıesi» mekemesi sondyqtan tutynýshylardy sýdy únemdep paıdalanýǵa shaqyryp otyr.

Mekemeniń málimetinshe, suranys artqan kezde 105-110 myń m³ sý taratylady. Sońǵy rekordty kórsetkish 16 mamyrda tirkeldi — 105 836 m³. Buǵan deıin aýyzsýdyń eń joǵary deńgeıde taratylý deregi 2023 jylǵy 31 shildede (108 700 m³), 2024 jylǵy 21 maýsymda (101 411 m³) tirkelgen. Salystyryp aıtsaq, 2024 jyldyń mamyr aıynda táýligine 76 380 tekshe metr aýyzsý berilgen.

- Sý tutyný deńgeıiniń artýyna qala turǵyndarynyń tirshilik nárin kógaldandyrý, baý-baqsha sýarý, kólik jýý sııaqty maqsatqa jumsaýy sebep. Qazirgi kezde uńǵymalar men sý alý qurylymdary maksımaldy rejımde jumys istep tur. Ózderińiz biletindeı, Prezıdent sýdy únemdeý mádenıetin qalyptastyrý jáne sýdy normatıvten artyq paıdalanǵandarǵa joǵary tarıf engizý múmkindigin qarastyrýdy usyndy. Osyǵan oraı mekemede aýyzsýmen qamtamasyz etý jáne sarqyndy sýdy burý qyzmetiniń 2025-2030 jyldarǵa arnalǵan dıfferentsıaldy tarıfi bekitildi. Jańa tarıf mamyr aıynan bastap qoldanysqa engizildi, - dedi mekeme basshysy Jasulan Abatov.

Ótken 5 jylda kórsetilgen qyzmet úshin ortasha tarıf mólsheri bir ózgergen joq. Sýdy taratý qyzmetiniń tómen baǵada bolýy saldarynan kásiporyn shyǵynǵa batqan. Sondyqtan osy jyly tarıfti ósirýge týra keldi. 

- Aýyzsý tarıfi halyqqa osy ýaqytqa deıin 1 m³ 43,79 teńge bolsa, endi 69,42 teńgege, ıaǵnı 58,5%-ǵa ulǵaıdy. Sarqyndy sýdyń tarıfi halyq úshin 1 m³ 46,16 teńge bolsa, bıyldan bastap 67,39 teńge bolyp ózgerdi, ıaǵnı 53,9%-ǵa ósti, - dedi kásiporyn dırektory. 

Al buǵan deıin biz Pavlodar oblysynda prokýratýra qabyldaǵan baqylaý sharalarynyń nátıjesinde 45 myń tutynýshy úshin sý jetkizý tarıfi tómendetilgenin jazǵanbyz.