Qyzylordada 3 jasar bala tórtinshi qabattan qulap ketti
QYZYLORDA. KAZINFORM - Qyzylorda qalasynda eresek adamdardyń qaraýynsyz qalǵan 3 jastaǵy ul bala tórtinshi qabattan qulap ketti. Onyń jaǵdaıy aýyr dep baǵalanyp otyr.
Oqıǵa oblys ortalyǵyndaǵy «Araı-3» shaǵyn aýdanyndaǵy kópqabatty úılerdiń birinde bolǵan. Bes qabatty turǵyn úıdiń tórtinshi qabatynan 2021 jylǵy ul bala qulap ketken.
«Sábı alǵan jaraqatyna baılanysty aýrýhanaǵa jatyzyldy. Balalardy qaraýsyz qaldyrmaýdy suraımyz. Onyń sońy qaıǵyly jaǵdaıǵa dýshar etýi yqtımal», - dep málim etti oblystyq tótenshe jaǵdaılar departamentinen.
Vedomstvo málimetinshe, bul – jyl basynan beri qaıtalanyp otyrǵan ekinshi jaǵdaı. Byltyr dál osyndaı 14 oqıǵa tirkeldi. Onyń 1-i Jańaqorǵan aýdanynda bolsa, qalǵany oblys ortalyǵynda tirkelgen.
Eske salsaq, budan buryn Qyzylordada QAJD bastyǵy sýǵa batqan balany qutqaryp qaldy.
