Qyzylordada 150 otbasy jańa páter kiltin aldy
QYZYLORDA. KAZINFORM - Qyzylorda qalasyna qarasty Tasbóget kentinde búgin kópqabatty eki úıden 150 otbasyna páter kilti tabystaldy. Bul is-sharaǵa oblys ákimi Nurlybek Nálibaev qatysty.
Aımaq basshysy qonystoı ıelerin quttyqtap, ıgi tilegin arnady.
«Memleket basshysy Qasym-Jomart Kemeluly Ulttyq quryltaıdyń Atyraýdaǵy otyrysynda «Baspana – jurttyń turmys sapasyn tanytatyn taǵy bir mańyzdy kórsetkish» dep erekshe toqtalǵan bolatyn. Prezıdentimiz halyqty turǵyn úımen qamtýǵa aıryqsha mán berip, memleket shyn muqtajǵa járdem jasaıtynyn únemi aıtyp keledi. Osyndaı qoldaýdyń arqasynda keıingi jyldary elimizdegi turǵyn úı qurylysynyń qarqyny tolastaǵan emes. Ótken jyly aımaqta 4 108 páterlik 300 turǵyn úı salyndy, 2400-ge jýyq páter tabystalyp, 11 myńnan astam turǵyn óz úıine qonystandy. Halyqtyń jaıly ómir súrýiniń basty alǵysharty – baspanamen qamtý jumystary bıyl da jalǵasyp jatyr. Bıýdjet qarajaty esebinen 13,3 mlrd teńgege 1 269 páterlik 67 turǵyn úıdiń qurylysy júrgiziledi. Onyń ishinde 950-deı páter oblys ortalyǵyna tıesili. Jyl basynan beri 462 otbasy qonys toıyn toılady. Búgin 150 otbasy baspana baqytyna kenelip, jańa turǵyn úılerdegi ár páter qýanysh pen shattyqqa, balalardyń kúlkisine tolady. Bul – áleýmettiń ál-aýqatyn arttyrýdaǵy memlekettik qoldaýdyń naqty kórinisi», – dedi aımaq basshysy.
Saltanatty rásim barysynda Indıra Kenjetaeva qonystoı ıeleri atynan qýanyshyn jetkizip, memleket jáne qoǵam qaıratkeri Nájmadın Musabaev aq batasyn berdi. Óńirdiń áleýmettik-ekonomıkalyq damýyna úles qosqan kent turǵyndary men qurylysty sapaly salýǵa atsalysqan merdiger mekeme qyzmetkerleri marapattaldy.
Aıta keteıik, «Aman qurylys», «Integrostroı», «AES and limited» kompanııalary salǵan kópqabatty turǵyn úılerdiń qurylysy ótken jyly tamyz aıynda bastalǵan edi. Jańa páterler áleýmettik az qamtylǵan otbasylarǵa, ata-ana qamqorlyǵynsyz qalǵan balalalarǵa tabystaldy.
