Qyzylordada 1100-den astam jasóspirim quqyq buzǵany úshin ustaldy

QYZYLORDA. KAZINFORM — Qyzylorda polıtsııasy respýblıkalyq «Ýchaske» jedel profılaktıkalyq is-sharasynyń 2 aı 10 kúnindegi aqparatty bólisti. 

Osy ýaqytta úı-jaılardy aralaý barysynda tirkeýde joq 56 ańshy qarýy, ıaǵnı sholaq myltyq, 5 gazdy, 1 uńǵysyz tapansha jáne 1 ıir oıyqty qarý tárkilendi. Odan bólek qarýdy saqtaý, alyp júrý erejesin buzǵan 141 qarý ıesine qatysty ákimshilik kodekstiń 484, 486-baptarymen ákimshilik hattama rásimdeldi.

— Quqyqbuzýshylyq jasaǵan 1154 kámeletke tolmaǵan ustalyp, onyń 58-i beıimdeý ortalyǵyna jatqyzyldy. Qalǵanyna ártúrli quqyqbuzýshylyqtary boıynsha hattama toltyryldy. Qoǵamdyq oqshaýlaýmen baılanysty emes jazany óteý sharty men tártibin buzýdyń 92 deregi anyqtaldy. Ártúrli quqyqbuzýshylyqqa barǵan 1225 adam ishki ister organdaryna jetkizilip, qol saýsaq izderi alyndy, — dedi oblystyq polıtsııa departamenti jergilikti polıtsııa qyzmeti basqarmasy bastyǵynyń orynbasary Raýan Áldeshov. 

Profılaktıkalyq is-shara 1 jeltoqsanǵa deıin jalǵasady. Departament ókili aımaqty aralaý kezinde polıtsııa qyzmetkerleri mindetti túrde arnaıy kıim úlgisinde bolatynyn eskertti.

— Qyzmettik kýáligin kórsetedi jáne zańdy talaptarmen ǵana júredi. Eger kúmán týyndasa, 102 nómirine habarlasýdy suraımyz, — dedi Raýan Áldeshov. 

Buǵan deıin biz Qyzylordada synyptastarynyń 16 jastaǵy qyzdy seksýaldy quldyqta ustaýyna baılanysty oqıǵadaǵy jábirlenýshiniń anasy ákimshilik jazaǵa tartylǵanyn jazǵan edik.