Qyzylorda turǵynyn óziniń júrgizýshisi tonaǵan

Qyzylorda oblysynda jeke júrgizýshisi jergilikti turǵynnyń úıine birneshe márte urlyqqa túsken. Saldarynan úı ıesine aqshalaı jáne zattaı zııan keltirgen, dep habarlaıdy Kazinform.

Shıeli aýdandyq polıtsııa bólimine jergilikti turǵyn aryzdanǵan. Onda úıinen quny shamamen 2 mln teńge turatyn altyn buıym men 5500 AQSh dollary mólsherindegi qarajaty urlanǵandyǵy aıtylǵan.

Polıtsııa qyzmetkerleri jedel is-sharalardy júrgizip, nátıjesinde polıtseıler kúdiktini ustady. Ol jábirlenýshiniń 30 jastaǵy jeke júrgizýshisi bolyp shyqty.

«Tekserý barysynda kúdiktiniń eki ret urlyq jasaǵany belgili boldy. Birinshi jaǵdaıda ol úıge jasyryn kirý arqyly jatyn bólmesinen altyn buıymdardy urlap, keıin olardy lombardqa ótkizgen. Ekinshi márte 5500 AQSh dollary kóleminde aqsha urlaǵan. Urlanǵan zattar tárkilendi. Kúdikti qamaýǵa alyndy», - dep málim etti Qyzylorda oblystyq polıtsııa departamentinen.

Vedomstvo málimetinshe, qazirgi ýaqytta QR Qylmystyq kodeksiniń 188-babynyń 3-bóligimen (Urlyq) sotqa deıingi tergep-tekserý áreketteri bastaldy. Atalǵan bap boıynsha múlki tárkilenip, eki jyldan jeti jylǵa deıingi merzimge bas bostandyǵyn shekteý, ne sol merzimge bas bostandyǵynan aıyrý kózdelgen.

Eske salsaq, bıyl Qyzylorda oblysynda zańsyz aınalymnan 122 qarý tárkilendi.