Qyzylorda oblysynyń ákimi turǵyndardy referendýmǵa qatysýǵa úndedi

QYZYLORDA. KAZINFORM — Qyzylorda oblysynyń ákimi Nurlybek Nálibaev óńir turǵyndaryna aldaǵy respýblıkalyq referendýmǵa baılanysty beıneúndeý jasady. 

— Qurmetti Syr jurtshylyǵy, ardaqty aǵaıyn. Jyl basynda Qyzylordada ótken Ulttyq quryltaı elimizdegi aýqymdy ózgerister men túbegeıli betburystardyń bastaýy bolǵany belgili. Osy alqaly jıynda Memleket basshymyz Qasym-Jomart Kemeluly usynǵan Konstıtýtsııalyq reformany qoǵam jan-jaqty talqylady, — dedi óńir basshysy.

Ol ár azamat óz tańdaýymyzdy naqtylaıtyn kún jaqyn qalǵanyn aıtty.

— Birtutas Qazaqstan halqynyń arman-ańsary, maqsat-múddesi keńinen qamtylǵan jańa Konstıtýtsııanyń jobasy respýblıkalyq referendýmǵa shyǵarylyp, ár azamat óz tańdaýymyzdy naqtylaıtyn kún jaqyn qaldy.

Aldaǵy jeksenbide qasterli Otanymyzdy, egemendigimiz ben táýelsizdigimizdi, aýmaqtyq tutastyǵymyzdy saqtaý, azamattarymyzdyń quqyqtary men bostandyqtaryn qorǵaý, elimizdiń tynyshtyǵy men turaqtylyǵyn qamtamasyz etýge baǵyttalǵan mańyzdy qadam jasaımyz.

«Adam memleket úshin emes, memleket adam úshin» qaǵıdatyna berik negizdelgen halyqtyq Konstıtýtsııaǵa qatysty túpkilikti sheshim halyq tańdaýyna súıenip qabyldanady. 

Buǵan deıingi saıası reformalar kezinde Syr jurtshylyǵy bereke-birliktiń, tatý tirliktiń úlgisin kórsetip belsendilik tanytqan bolatyn. Bul joly da jerlesterimiz jańǵyrýdyń jańa kezeńiniń mánin tereń túsinip, óz kózqarasyn bildirýdegi úlgili joldy jalǵaıdy dep senemin.

Bizdiń azamattarymyzdyń boıyndaǵy otanshyldyq pen jaýapkershilikke negizdelgen ustanymdary aıqyn. Ol — eldiń jarqyn bolashaǵy, bekem birligi jáne myzǵymas tutastyǵy, — dedi Nurlybek Nálibaev.