Qyzylorda oblysynda úzdik mektepke 34 mln teńge tabystaldy
QYZYLORDA. KAZINFORM – Qyzylorda oblysynda pedagogıkalyq tamyz keńesinde úzdik mektepke-lıtseıge 34 mln teńge tabystaldy.
Oblys ákimi Nurlybek Nálibaevtyń qatysýymen Óner ortalyǵynda «Digital Kazakstan: Jańa zamandaǵy bilim berý» taqyrybynda oblystyq pedagogıkalyq tamyz keńesi ótti.
Oblys ákimi jas urpaqqa sapaly bilim berýdegi, tárbıeleýdegi ustazdardyń eńbegin erekshe atap ótip, atqarylǵan jumystardy baıandady.
«Jyldaǵy dástúr boıynsha Tamyz keńesinde bas qosyp, bilim salasyndaǵy jetistikterimizdi saralap, máseleler men olardy sheshý joldaryn birlese talqylaýǵa jınaldyq. Memleket basshysy Qasym-Jomart Kemeluly Ulttyq quryltaıdyń ekinshi otyrysynda «Mektep – bilimniń ǵana emes, tálim-tárbıeniń ordasy. Balanyń boıyna bilimmen qatar adamgershilik qundylyqtardy sińirý – ustazdyń mindeti. Osyǵan oraı balabaqshadaǵy jáne mekteptegi bilim men tárbıe isine bárimiz qoǵam bolyp mán berýimiz kerek, sondaı-aq belsene atsalysýymyz qajet» dep atap ótken bolatyn.
Qaı kezeńde de memleket damýynyń basty tetigi, strategııasy sapaly bilimge negizdelgen. Bilim sapasyn arttyrý, pedagogter qaýymy men oqýshylarǵa jaıly jaǵdaı jasaý – búgingi kúnniń alǵysharty. Bul – keleshegimizdi kemel, eldigimizdi máńgi etýdi kózdeıtin memlekettik kózqarasymyz jáne azamattyq ustanymymyz. Bizdiń oqý-aǵartý salasyn damytýǵa, bilim sapasyn kóterýge baǵyttalǵan bar jumysymyz osyndaı altyn ózekke negizdelgen. Bıylǵy tamyz keńesiniń «Digital Kazakstan: Jańa zamandaǵy bilim berý» ataýyn enshileýi – bilim salasyn tsıfrlandyrýdy ári qaraı jalǵastyrý qajet ekendiginiń bir dáleli.
Bıyl bilim salasyna bólingen qarjy 262,1 mlrd teńgege jetip, oblys bıýdjetiniń 35,8 %-yn (bıýdjet 732,8 mlrd teńge) qurady. Bul byltyrmen salystyrǵanda 8,5%-ǵa artyq (2023 jyly 241,5 mlrd teńge). Tıisinshe, aldaǵy jyldary bilim salasyna bólinetin qarjy kólemi artady. Jańa mektepter salý, apatty mektepterdi jáne úsh aýysymdyq oqýdy boldyrmaý – bilim salasyndaǵy basym baǵyttardyń biri», - dedi olys ákimi.
Bıyl balabaqshalardy qarjylandyrýǵa 53,7 mlrd teńge qarjy bólinip, ótken jylmen salystyrǵanda 9,8 mlrd teńgege artty (2023 jyly 43,9 mlrd teńge).
«Ótken jyldyń shilde aıynan bastap menshik nysanyna qaramastan barlyq mektepke deıingi uıymdarǵa tsıfrlandyrý salasyndaǵy jetistikterimizdiń biri – «Face ID» mobıldi qosymshasy engizildi. Bul arqyly balabaqshaǵa naqty kelgen tárbıelenýshilerge ǵana memlekettik tapsyrys ornalastyrylyp, nátıjesinde 3 mlrd teńge únemdeýge múmkindik týdy.
Qazir úıirmelerge naqty kelgen balalardy esepke alý úshin atalǵan júıeni mádenıet jáne sport salasyna engizýdemiz. Bálkim, bul jumystar ońaı aqsha taýyp úırenip qalǵan keıbir kásipkerlerge unamaýy múmkin. Degenmen, biz tsıfrlandyrý salasyndaǵy jańashyldyqtardy engizip, bıýdjet qarajatynyń maqsatty jumsalýyna qatań baqylaý ornatatyn bolamyz», – dedi N.Nálibaev.
Jıynda eleýli eńbektiń arqasynda ustazdar qaýymy marapat tórinen kórinip, olardyń birqataryna QR Oqý-aǵartý mınıstrliginiń marapaty tabystaldy. Atap aıtsaq, Y.Altynsarın, «Bilim berý isiniń Qurmetti qyzmetkeri» tósbelgis, «Arnaıy bilim berý isiniń úzdigi», «Qosymsha bilim berý isiniń úzdigi», «Orta bilim berý isiniń úzdigi» dıplomdary, oblys ákiminiń Alǵys haty tabystaldy.
Sonymen qatar, oblystyń «Úzdik orta bilim uıymy» grantyn jeńip alǵan Jalaǵash aýdanyndaǵy Ál-Farabı atyndaǵy №201 mektep-lıtseıine 34 mln teńgeniń sertıfıkaty berildi.
