Qyzylorda oblysynda sý tasqyny kezeńi aıaqtaldy

ASTANA. KAZINFORM – TJM Qyzylorda oblysynda sý tasqyny kezeńi aıaqtalǵanyn habarlady.

- Búgin, 20 naýryzda Qyzylorda oblysynda sý tasqyny kezeńi resmı túrde aıaqtaldy. Syrdarııa ózeni muzdan tolyǵymen tazartyldy, ıaǵnı seńniń júrýi Kishi Aral teńizine jetti, - dep málimdedi vedomstvodan.

Esterińizge sala keteıik, Qyzylorda sý torabynan Kishi Aralǵa deıingi qashyqtyq 744 shaqyrymdy quraıdy. Muz osy joldy synı jaǵdaılardy týdyrmaı, eńserdi.

Oblysta ózendegi sý deńgeıiniń monıtorıngi jalǵasýda.

- Turǵyndarǵa sý qoımalarynyń janynda qaýipsizdik erejelerin saqtaýdy usynamyz, - dep tolyqtyrdy TJM-nan.

Aıta keteıik, sý tasqynyna baılanysty Qulsaryǵa Atyraý men Mańǵystaýdan kómek keldi.