Qyzylorda oblysynda Syr óńiri tarıhynyń ekinshi tomy jaryq kóredi
Qyzylorda oblysynda Syr óńiri tarıhy jáne Horezm ekspedıtsııasy arhıv materıaldarynyń ekinshi tomy jaryq kóredi, dep habarlaıdy Kazinform.
Qorqyt ata atyndaǵy Qyzylorda ýnıversıtetiniń ǵalymdary Reseıge baryp qaıtty. Onda Reseı ǵylym akademııasynyń N.N.Mıklýho-Maklaı atyndaǵy Etnologııa jáne antropologııa ınstıtýtynyń muraǵatynda jumys istedi. Sondaı-aq memlekettik Shyǵys halyqtary mýzeıinde ǵylymı-zertteýmen aınalysty.
Ǵalymdar Shyǵys Aral mańynyń arheologııalyq muralaryn zerttep, Horezm arheologııalyq-etnografııalyq ekspedıtsııasynyń jańa arhıvtik derekterin júıeleý maqsatynda jumys júrgizdi.
Sapar barysynda «Arheologııa jáne etnografııa» ǵylymı ortalyǵynyń jetekshisi, fılosofııa doktory Ázilhan Tájekeev, ortalyq qyzmetkerleri – fılosofııa doktory Baǵlan Shoraev, doktorant Yslam Qurmanııazov, joba oryndaýshysy Rústem Dármenov jańa derektermen tanysty.
«1946-1990 jyldary oblys aýmaǵynda KSRO Ǵylym akademııasy Horezm arheologııalyq-etnografııalyq ekspedıtsııasy zertteý jumystaryn júrgizgen edi. Muraǵattyq materıaldar qazirgi kezde N.N.Mıklýho-Maklaı atyndaǵy Etnologııa jáne antropologııa ınstıtýtynda saqtaýly. Jobanyń negizgi maqsaty – ınstıtýttaǵy Syr óńiriniń arheologııasy men tarıhyna qatysty ǵylymı esepter, jádigerlerdi taýyp, kóshirmesin elimizge alyp kelý. Túgisken qorymdary, Uıǵaraq obalary, Shirik-rabat arheologııalyq mádenıeti, Jetiasar eskertkishterine qatysty (dalalyq, aerosýret jáne esepter) ǵylymı derekter negizinde jumystar júzege asyryldy», – dedi Ázilhan Tájekeev.
Aıta ketý kerek, ǵylymı issapar QR Ǵylym jáne joǵary bilim mınıstrliginiń 2023-2025 jyldarǵa arnalǵan granttyq qarjylandyrý jobasy aıasynda iske asyryldy. Aldaǵy ýaqytta osy derekter negizinde Syr óńiri tarıhy jáne Horezm ekspedıtsııasy arhıv materıaldarynyń ІІ tomy jaryq kórmek.
Eske salaıyq, Qyzylorda oblysynda Saýysqandyq shatqalyndaǵy petroglıfter qorshalyp, qorǵaýǵa alynatynyn jazǵan bolatynbyz.
