Qyzylorda oblysynda sapaly joldyń úlesi arta tústi

QYZYLORDA. KAZINFORM — Bıyl Qyzylorda oblysynda 44 mlrd teńgeden astam qarjyǵa 300 shaqyrym avtokólik joly jóndeýden ótti.

Qyzylorda oblysynda respýblıkalyq jáne oblystyq bıýdjetten bólingen 44 mlrd. 703 mln teńgege 300 shaqyrym avtomobıl joly jóndeýden ótti. Osylaısha jaqsy jaǵdaıdaǵy joldyń úlesi 92 paıyzdan asty.

Bul týraly oblys ákimi Nurlybek Nálibaev Ortalyq kommýnıkatsııalar qyzmetiniń Qyzylordada ótken brıfınginde aıtty.

«Oblys ortalyǵynyń negizgi kósheleri: áýejaıdan — Beıbarys kóshesine deıingi aralyq, qalanyń Shıeliden kireberis joly, magıstraldy ıAssaýı, Jappasbaı batyr kósheleri, Táýelsizdiktiń 25 jyldyǵy dańǵyly (Sqltan Beıbarys kóshesinen Ábilqaıyr han kóshesine deıin) tórtjolaqty bolyp keńeıtildi. Qyzylorda qalasynda 4 mlrd. 700 mln. teńgege Janqoja batyr kóshesi arqyly ótetin temir jol asty avtojol, Aral, Jańaqorǵan aýdandarynda quny 4 mlrd 500 mln teńgege temir jol ústinen aspaly kópir qurylysy júrýde. Kólik-logıstıka salasynda da jetistikterimiz kóp», — dedi aımaq basshysy.

Aıta keteıik, kóp jyl boıy kún tártibinen túspegen «Qyzylorda-Jezqazǵan» avtojoly Prezıdenttiń tikeleı tapsyrmasymen qaıta jańǵyrtylýda. Joba quny — 108 mlrd 500 mln teńge. Qyzylorda oblysynyń aýmaǵyna tıesili 216 shaqyrym joldyń 140 shaqyrymy aıaqtaldy. Qalǵan bóligi 2026 jyly el ıgiligine beriledi.

Munan bólek, kópshilikti tolǵandyrǵan «Batys Eýropa-Batys Qytaı» halyqaralyq dáliziniń Qyzylorda qalasynan Aqtóbege deıingi aýmaǵyn tórt jolaqtyǵa aınaldyrý máselesi de Memleket basshysynyń tapsyrmasymen sheshimin tabýda. Halyqaralyq dálizdiń osy aýmaǵyn 1-sanatqa aýystyrý boıynsha «QazAvtoJol» aktsıonerlik qoǵamy joba-smetalyq qujattama ázirleýde.