Qyzylorda oblysynda medıtsına salasynda aýqymdy jobalar júzege asýda
QYZYLORDA. KAZINFORM - Qyzylorda oblysynda medıtsına salasynda aýqymdy jobalar júzege asýda. Densaýlyq saqtaý salasyna qajetti qyzmettik kólikter alynyp, zamanaýı qural-jabdyqtarmen qamtamasyz etýde oń ózgerister bar.
Jaqynda kópbeıindi oblystyq aýrýhana bazasynda jańa MRT apparaty iske qosyldy. Bul sala mamandarynyń joǵary deńgeıde jumys atqarýyna oń septigin tıgizedi.
«Memleket basshysy densaýlyq saqtaý salasyn basym baǵyttardyń biri retinde belgilep, halyqqa arnaǵan Joldaýynda naqty talaptar qoıdy. Osyǵan oraı kópbeıindi oblystyq aýrýhana bazasynda jańa MRT apparaty iske qosylyp, 70 oryndyq perınataldyq bólim ashyldy. Burynǵy apparat buzylyp, aýrýhanada 2016 jyldan beri mundaı qural-jabdyq bolǵan joq. Máseleniń sheshimin tabý úshin bıýdjetten qarjy bólip, bıyl baǵasy 646 mln. teńge turatyn MRT apparaty alyndy. Jańa qural óńir halqynyń ıgiligine, aýrýdyń aldyn alý, anyqtaý jumystaryn ilgeriletýge qyzmet etedi», – deıdi sala mamandary.
Osyndaı qamqorlyqtyń nátıjesinde oblystyq kópbeıindi aýrýhanada kúrdeli ota jasaýǵa múmkindik jasalyp otyr. Ótken jyldyń jeltoqsanynda búırek aýystyrý otasyn A. Syzǵanov atyndaǵy Ulttyq ǵylymı hırýrgııa ortalyǵy basqarma tóraǵasy, medıtsına ǵylymdarynyń doktory, professor Bolatbek Baımahanovtyń basshylyǵymen qyzylordalyq dárigerler sátti atqaryp shyqty.
«Elimizde 2011 jyldan beri búırek jáne baýyr transplatatsııasy keń aýqymda júrgizilip keledi. Búginge deıin 1 000-ǵa tarta ota jasaldy. Onyń 700-i búırekke qatysty bolsa, qalǵanyn baýyr transplantatsııasy quraıdy. Bul – óte kúrdeli is, oǵan árbir dáriger úlken jaýapkershilikpen qaraıdy. Tájirıbesi joǵary bolýy eskeriledi. Biz oblystyq kópbeıindi aýrýhana dárigerleriniń usynysyn qabyl aldyq. Aýrýhana oǵan qajetti medıtsınalyq qural-jabdyqtarmen qamtamasyz etilgen. Ota tórt saǵattan astam ýaqytqa sozyldy. Jalpy, bul óte jiti nazarda bolady. Barlyǵy aldyn-ala zertteledi», - deıdi Bolatbek Baımahanov.
Aıta ketsek, óńirdiń medıtsına salasynda aýqymdy jobalar júzege asýda. 2022 jyly 45 jedel járdem kóligi alynyp, oblystyq medıtsınalyq jedel járdem stansasy 100% avtokólikpen qamtamasyz etildi. Ótken jyly densaýlyq saqtaý uıymdaryna 512,5 mln. teńgege 25 jańa sanıtarlyq avtokólik tabystaldy.
Ótken jyly tamyz aıynda Qyzylorda qalasynyń sol jaǵalaýynda quny 2 mlrd 700 mln teńgeni quraıtyn Qan ortalyǵynyń irgetasy qalandy. Nysan jylyna 5000-10000 adamdǵa qyzmet kórsete alady. Ortalyqtyń salynýy – aımaqtyń densaýlyq saqtaý salasy úshin mańyzdy ári utymdy sheshim. Bul – oblys turǵyndarynyń densaýlyǵyn saqtaý jáne qorǵaý baǵytyndaǵy naqty is-sharanyń biri.
Turǵyndar suranysyna sáıkes, bıyl óńirdiń barlyq eldi mekenderindegi densaýlyq saqtaý mekemelerine 200 sanıtarlyq avtokólik satyp alynady Oǵan qosa 9 medıtsınalyq nysanǵa kúrdeli jóndeý júrgizilip, 5 nysannyń jylý júıesi gazǵa aýystyrylýda. Bul jumystarǵa 3 mlrd. 700 mln.teńge qaraldy.
Jaqyn kúnderi Jańaqorǵan aýdanyndaǵy kópbeıindi aýdandyq ortalyq aýrýhana bazasynda «Qamqorlyq» ońaltý ortalyǵy ashylady. «Qazaqstan halqyna» qoǵamdyq qory sońǵy eki jylda aımaqtyń densaýlyq saqtaý salasyna 2 mlrd. teńge qarjy baǵyttady. Oǵan oblystyq balalar aýrýhanasy bazasynda «Qamqorlyq» reabılıtatsııalyq ortalyǵy ashylyp, asa qymbat dári-dármekter alyndy. Sondaı-aq, qor respýblıka boıynsha 3 oblysta ǵana bar, quny 1 mlrd. 100 mln teńge turatyn onkologııalyq skrınıng júrgizýge arnalǵan jyljymaly medıtsınalyq keshenmen qamtamasyz etti.
Mamandardyń biliktiligin arttyrý máselesi de nazardan tys qalǵan emes. Dárigerlerdiń respýblıkalyq ortalyqtarda ǵana emes, shet elderde de biliktiligin arttyrýǵa jergilikti bıýdjetten 80 mln. teńge bólindi. Sáýir aıynda Stambýl qalasyndaǵy Qazaqstannyń bas konsýlynyń qoldaýymen Túrkııadaǵy «Memorıal» klınıkasyna 10 reanımatolog jáne 5 kardıolog biliktilik arttyrýǵa barady. Bul baǵyttaǵy sharalar jyl kóleminde jalǵasyn tabady.
