Qyzylorda oblysynda qos azamattyǵy bar reseılik áıel anyqtaldy

QYZYLORDA. KAZINFORM - Qyzylorda oblysynda reseılik áıel qos azamattyǵy bolǵany úshin aıyppul arqalady.

Jyl basynan beri Qyzylorda oblysy boıynsha QR kóshi-qon zańnamasyn buzǵan 78 sheteldik azamat ákimshilik jaýapkershilikke tartyldy. Onyń ishinde sot sheshimi boıynsha 6 sheteldik elden tysqary shyǵaryldy.

«Qos azamattyǵy bar 1 adam anyqtalyp, oǵan qatysty tıisti shara qabyldandy. Atap aıtqanda, Qyzylorda qalasy kóshi-qon bóliminiń qyzmetkerleri tekserý barysynda QR azamattyǵy týraly zańnamasyn buzǵan quqyq buzýshyny anyqtady. Reseı Federatsııasynyń 40 jastaǵy azamatshasyna qatysty QR zańnamasynda belgilengen merzimde shetel azamattyǵyn alý faktisin habarlamaý boıynsha ákimshilik hattama toltyryldy», - dep málim etti Qyzylorda oblystyq polıtsııa departamentinen.

Vedomstvo málimetinshe sot sheshimimen azamatsha 516 880 teńge kólemindegi ákimshilik aıyppul túrinde jaýapkershilikke tartylǵan.

Eske salsaq, budan buryn Qyzylorda oblysynda eki adamnyń ólimine sebepker bolǵan kólik júrgizýshisi sottaldy.