Qyzylorda oblysynda esirtki jarnamalaǵan 115 saıt buǵattaldy

QYZYLORDA. KAZINFORM — Aımaqta «Kıbernadzor» júıesi arqyly sıntetıkalyq esirtkini jarnamalaǵan 115 saıt buǵattaldy, dep habarlaıdy Polisia.kz. 

Óńirde qoǵam saýlyǵyna tikeleı qaýip tóndiretin esirtkige qarsy kúres jumystary júıeli túrde júzege asyrylyp keledi. Oblystyq polıtsııa departamentiniń esirtki qylmysyna qarsy kúres basqarmasynyń bastyǵy Birjan Bagısovtyń aıtýynsha, quqyq qorǵaý organdary bul baǵytta keshendi ári naqty sharalardy qolǵa alǵan.

— Oblys ortalyǵynda polıtsııa qyzmetkerleri kúndelikti kópqabatty úılerdiń aýlalary, garajdar men qurylys nysandaryn tekserip, jedel basqarý ortalyǵynyń beınekameralary arqyly turaqty baqylaý júrgizip jatyr. Nátıjesinde esirtki jarnamasy bar 20 graffıtı joıylyp, zańsyz jazýlardyń sany azaıdy. Sonymen qatar «Kıbernadzor» júıesi arqyly sıntetıkalyq esirtkini jarnamalaǵan 115 saıt buǵattaldy. Qazirgi ýaqytta izdeýdegi qylmyskerlerdi anyqtaý baǵytyndaǵy jumystar jalǵasyp jatyr, — dedi Birjan Babyruly.

Onyń aıtýynsha, qazirgi tańda uıymdasqan qylmystyq toptardyń áreketterin anyqtaý jáne qylmystyq jolmen alynǵan qarajattardy zańdastyrý derekterin áshkereleý baǵytynda keshendi jedel-izdestirý sharalary júrgiziledi.

Buǵan deıin Qostanaıda esirtkini jarnamalaıtyn 100-den astam graffıtı joıylǵany týraly jazdyq.

Sondaı-aq Pavlodarda salmaǵy 308 keliden asatyn keptirilgen marıhýana tárkilendi.