Qyzylorda oblysynda birinshi sortty un birden 35,2%-ǵa qymbattady
Qyzylorda oblysynda birinshi sortty naýbaıhanalyq un 35,2%-ǵa qymbattady, dep habarlaıdy Kazinform.
Syr óńirinde tabıǵı-klımattyq erekshiligine sáıkes azyqtyq astyq óndirilmeıdi. Sol sebepti un elimizdiń bıdaı óndirýshi óńirlerinen tasymaldanady.
«Oblys turǵyndarynyń suranysyn qanaǵattandyrý maqsatynda un Qostanaı, Aqmola, Qaraǵandy, Soltústik Qazaqstan oblystarynan jetkiziledi. Qyrkúıek aıynyń ekinshi onkúndiginde elimizde un baǵasynyń ósýi baıqalady. Mundaı jaǵdaı Qyzylorda oblysynda da kórinis berdi. Oblysta kóterme un jetkizýshilerdiń qoımasynda І sortty naýbaıhanalyq un 170 teńgeden satylǵan edi. Endi ol 35,2%-ǵa qymbattap, 230 teńgege jetti», - dep málim etti oblystyq aýyl sharýashylyǵy basqarmasynan.
Oblysta birinshi sortty bıdaı uny men áleýmettik nan baǵasyn turaqtandyrý maqsatynda turaqtandyrý qoryna Qostanaı oblysynyń «Qazaq uny» JShS-men kelisi 128 teńgeden 4 760 tonna unǵa kelisimshart jasalǵan.
«Búginde osy kólemnen 1 451,7 tonnasy jetkizilip, naýbaıhanalarǵa 128 teńgeden taratylyp jatyr. Turaqtandyrý qoryna áli de jetkiziletin 3 308,3 tonna un bar. Bul óz kezeginde nan baǵasyn turaqty ustaýǵa múmkindik beredi dep josparlanýda. Oblystyń 7 aýdany jáne qalanyń qoımalarynda naýbaıhanalyq un 618 tonnany qurap otyr.
Qazirgi ýaqytta QR Aýyl sharýashylyǵy mınıstrligi men «Azyq-túlik kelisimshart korporatsııasy» UK» AQ jáne oblys ákimdigi tarapynan óńirge 3 631,8 tonna astyq kólemin bólý jóninde memorandýmǵa qol qoıyldy. Oblys naryǵynda birinshi sortty bıdaı unyna tapshylyq baıqalmaıdy», - dep atap ótti basqarmadan.
