Qyzylorda oblysynda bıyl 11 medıtsınalyq nysan paıdalanýǵa beriledi

QYZYLORDA. KAZINFORM - Qyzylorda oblysynda 16 medıtsınalyq nysan paıdalanýǵa berilse, endi 11-i jyl sońyna deıin el ıligine tabystalady.

«Aýyldyq densaýlyq saqtaýdy jańǵyrtý» ulttyq jobasy boıynsha óńirde 11 mlrd teńgege 27 nysan salý kózdelgen. Ótken jyly 15 dárigerlik ambýlatorııa men 1 medıtsınalyq beket paıdalanýǵa berildi. Qalǵan 11 nysan jyl sońyna deıin halyq ıgiligine tabystalady. Bul týraly oblys ákimi Nurlybek Nálibaev Ortalyq kommýnıkatsııalar qyzmetiniń Qyzylorda qalasynda ótken kóshpeli brıfınginde baıandady.

«Sońǵy 2 jylda 4,1 mlrd teńgege 13 densaýlyq saqtaý nysany kúrdeli jóndeýden ótti. Oblys ortalyǵynda bir aýysymda 100 kelýshige arnalǵan emhana men onkologııalyq bólimshesi bar 300 oryndyq kópbeıindi aýrýhananyń qurylysy júrip jatyr. Densaýlyq saqtaý mekemeleriniń avtoparkteri jyl saıyn jańartylady. Ótken jyly 25, bıyl 200 sanıtarlyq avtokólik tabystadyq. Osy kezge deıin jeke ǵımaraty bolmaǵan oblystyq Qan ortalyǵynyń jańa ǵımaratyn qoldanysqa berdik. Aldaǵy ýaqytta Qyzylorda qalasynda 200 tósek-orynǵa arnalǵan zamanaýı perınataldyq ortalyq qurylysy bastalady», – dedi N. Nálibaev.

Aıta ketsek, oblysta byltyrdan beri 1 myń 720 oryndyq 6 mektep ashylsa, 4 mektepke 1 myń 850 oryndyq qosymsha ǵımarat salyndy. «Jaıly mektep» jobasymen 900 oryndyq mektep ashyldy.