Qyzylorda oblysynda bıyl 1 557 adam qyzylsha aýrýyn juqtyrdy
QYZYLORDA. KAZINFORM - Qyzylorda oblysynda jyl basynan beri laboratorııalyq zertteý nátıjesimen 1557 adamnyń qyzylsha aýrýyn juqtyrǵany naqtylandy.
Atalǵan aýrýdyń basym bóligi, 1364 jaǵdaı 14 jasqa deıingi balalar arasynda anyqtaldy. Onyń ishinde 365 jaǵdaı 1 jasqa tolmaǵan sábıler arasynda tirkelgen. Qalǵanyn eresek turǵyndar quraıdy.
«Qyzylsha indetine shaldyqqandardyń kópshiligi aýrýǵa qarsy ekpe almaǵan. Olardyń sany jalpy syrqattanýshylyqtyń 72,1 paıyzyna jetti. Naýqastardyń arasynda ekpe alǵandary da kezdesti. Alaıda olar qyzylshaǵa qarsy ekpeniń tolyq kýrsyn almaǵan. Saldarynan aǵzada tolyq ımmýnıtet qalyptaspaǵan. Oblys boıynsha anyqtalǵan derekterdiń basym bóligi (1233 jaǵdaı) Qyzylorda qalasynyń úlesine tıedi. Al aýdandar boıynsha Aralda - 74, Qazalyda - 61, Qarmaqshyda - 37, Jalaǵashta - 22, Syrdarııada - 8, Shıelide - 79, Jańaqorǵanda - 43 derekti quraıdy. Oblys kóleminde qyzylshamen syrqattanýshylyq kórsetkishi boıynsha tómendeý tendentsııasy baıqalady», - dedi Qyzylorda oblysynyń sanıtarııalyq-epıdemıologııalyq baqylaý departamenti basshysynyń orynbasary Álııa Ábdiqaıymova.
