Qyzylorda oblysynda 5 jylda 206 ákimdi halyq saılady

QYZYLORDA. KAZINFORM – Ótken jyly Qyzylorda oblysynda 56 ákim jańadan saılandy. Olardyń 30-yn saıası partııalar, al qalǵany ózin ózi usynǵan.

Oblystyq saılaý komıssııasy tikeleı saılaý júıesi qoldanysqa engizilgeli ákim saılaýlary belsendi túrde júrgizile bastaǵanyn málimdedi.

- 2021 jyldan bastap búginge deıin 206 ákim saılaýy ótti. Jańadan saılanǵan ákimderdiń 103-i buryn aýyldyq okrýg ákimi qyzmetin atqarsa, 103-i alǵash ret saılandy. Byltyrǵy 56 saılaý boıynsha 41 ákimniń ókilettilik merzimi aıaqtalǵan bolsa, qalǵan 15-iniń ókilettiligi merziminen buryn toqtaǵan, - dedi komıssııa tóraǵasy Ádilbek Ersultanov.

Qazirgi kúni oblysta aýdandyq mańyzy bar kent jáne aýyldyq okrýg ákimderiniń sany – 146.

Onyń 143-i – er adam, 3-i – áıel. 146 ákimniń 69-yn saıası partııalar, al qalǵany ózin ózi usynǵan.

- Ákimder saılaýy bıyl da jalǵasady. Zańǵa sáıkes ákimderge 4 jyl merzimge ókilettilik beriledi. 2026 jyly 29 kent jáne aýyldyq okrýg ákiminiń saılanǵanyna 4 jyl tolady. Bıyl saılanatyn 29 aýyl ákiminiń 3-i Qyzylorda qalasynda, 3-i Aral, 5-i Qazaly, 6-y Jalaǵash, 2-i Syrdarııa, 7-i Shıeli, 3-i Jańaqorǵan aýdandarynda ótedi, - dedi komıssııa tóraǵasy. 

Alǵashqy saılaý 8 aqpan kúni Syrdarııa aýdanynda ótpek. Aýdan ortalyǵynyń turǵyndary saıası mańyzdy shara barysynda Tereńózek kentiniń ákimin saılaıdy.

Buǵan deıin Memlekettik keńesshi Erlan Qarın aýyl jáne aýdan ákimderin tikeleı saılaý – buryn-sońdy bolmaǵan saıası tájirıbe ekenin atap ótken edi.