Qyzylorda oblysynda 432 órt oqıǵasy tirkeldi

QYZYLORDA. KAZINFORM — Qyzylorda oblysynda jyl basynan beri 432 órt oqıǵasy tirkeldi. Bul ótken jyldyń esepti kezeńindegi kórsetkishten 9,1% kóp. 

Oblystyq tótenshe jaǵdaılar departamentiniń málimetine súıensek, órt saldarynan 6 adam kóz jumyp, 10 adam túrli dárejedegi dene jaraqatyn aldy.

— Jylý berý maýsymy bastalǵaly, ıaǵnı 1 qazannan beri turǵyn sektorlarda 34 órt oqıǵasy boldy. Ótken jylmen salystyrǵanda 27,6% qysqarǵan. Órtten 1 adam qaza tapty, byltyrǵydan 2 ese az. Jýyrda Jalaǵash aýdanynyń Buqarbaı batyr aýylyndaǵy baraq tıpti jeke turǵyn úıdiń jatyn bólmesi otqa orandy. Oqıǵa ornynan úı ıesiniń máıiti tabyldy. Órt ózdigen óshken. Bizdiń boljamymyzsha, ol óshpegen temekiniń tuqylynan kúsh alǵan. Saraptama taǵaıyndaldy, — dedi departamenttiń memlekettik órt baqylaý basqarmasy bastyǵynyń orynbasary Arman Dastenov. 

Qutqarýshylardyń aıtýynsha, tilsiz jaýdyń kópshiligi turǵyndardyń órt qaýipsizdik sharalaryna salǵyrt qaraýynan tutanady. Onyń ishinde turmystyq peshterdiń tehnıkalyq jaǵdaıyna mán bermeý, elektr jelileriniń qysqasha tuıyqtalýy sııaqty sebepter bar. 

Abyroı bolǵanda, bıyl gazdan ýlaný jáne órtten jaraqat alý jaǵdaılary tirkelgen joq. 

Jýyrda el óńirlerinde qysqy kezeńdegi tótenshe jaǵdaılardyń aldyn alýǵa jáne olardy joıýǵa azamattyq qorǵaý memlekettik júıesiniń aýmaqtyq kishi júıesiniń ázirligin arttyrýǵa baǵyttalǵan «Qys-2025» komandalyq-shtabtyq oqý-jattyǵýlary ótti.