Qyzylorda oblysynda 29 eldi mekendi sý basýy múmkin

QYZYLORDA. KAZINFORM — Syrdarııa ózeniniń Qyzylorda oblysynyń aýmaǵynda sý basý qaýpi joǵary 29 eldi meken bar.

Qazir Qyzylorda qalasy aýmaǵynda ózen muzdan tolyq tazarǵan. Qys boıy qatyp qalǵan aqyryndap tómengi bólikke qozǵalǵany baıqalyp otyr. 

— Seńniń júrýi oblys ortalyǵynan ótip ketti. Qazir qorǵanys bógetteri qalypty jaǵdaıda tur, — dedi oblystyq tótenshe jaǵdaılar departamentiniń basqarma bastyǵy Beıbithan Spanov.

Al soltústik aýdandarda muzdyń ustasýy áli de baıqalady. Muzdyń qalyńdyǵy — 20-40 santımetr. Oblysta sý basý qaýpi joǵary 29 eldi meken bar. Onda turatyn halyq sany 70 myń adamǵa jýyq.

— Darııa boıynda 61 evakýatsııalyq jınaqtaý, 71 evakýatsııalyq qabyldaý pýnkti ornalasqan. Sondaı-aq 22 ýaqytsha ornalastyrý, 13 jylytý pýnkti jumys jasaıdy. Departamentten 128 jeke quram, arnaıy maqsattaǵy 25 tehnıka, 6 júzý quraly, 33 motopompa ázirlikke keltirildi, — dedi B.Spanov.

Oblys ortalyǵy tusynda bes ýchaske qaýipti dep tanylǵan. Mamandar atalǵan aýmaqtardy táýlik boıyna baqylaýǵa alyp otyr. 

Mamandardyń sózinshe, Qyzylorda qalasynyń tusynan 22-28 aqpan aralyǵynda seń júrse, naýryzdyń alǵashqy jartysynda ol Qazaly, Aral aýdanyna jetedi degen boljam bar.

Eske salsaq, budan buryn qurylysy 5 jyl buryn toqtap qalǵan Qyzylorda sý toraby paıdalanýǵa berilgenin jazdyq.