Qyzylorda oblysynda 25 páterge túsken ury ustaldy
QYZYLORDA. KAZINFORM - Qyzylorda oblysynda polıtseıler 25 márte páter urlyǵyn jasaǵan uryny ustady. Ol jábirlenýshilerge 19 mln teńge materıaldyq shyǵyn keltirgen.
Qyzylorda oblysy Polıtsııa departamentiniń Krımınaldyq polıtsııa basqarmasy jedel-izdestirý is-sharalaryn júrgizdi. Nátıjesinde urlyqty kásip etken jigit Jańaqorǵan aýdanynda qylmys ústinde qolǵa tústi.
«Kúdikti úı ıeleriniń joqtyǵyn paıdalanyp, plastık terezelerdi kúshtep ashý arqyly úı ishine zańsyz kirgen. Aqsha men altyn buıymdardy urlaǵan. Kúdikti Túrkistan oblysy Qazyǵurt aýdanynyń 26 jastaǵy turǵyny bolyp shyqty», - dep málim etti Qyzylorda oblystyq polıtsııa departamentinen.
Odan jábirlenýshilerge tıesili altyn buıymdar men ózge aıǵaq zattar dálel retinde alynǵan.
«Tergeý barysynda atalǵan kúdikti oblys aýmaǵynda 25 páterge urlyqqa túskeni belgili boldy. Jábirlenýshilerge 19 mln teńge materıaldyq shyǵyn keltirgen. Kúdiktiniń oblys kóleminde jasalǵan basqa da qylmystarǵa qatystylyǵy tekserilip jatyr. Tergep-tekserý áreketteri jalǵasýda. Kúdikti qamaýǵa alyndy», - dep tolyqtyrdy departamentten.
Eske salsaq, budan buryn Qyzylorda oblysynyń turǵynynan 7 mln teńge bopsalaǵan uıymdasqan top músheleri ustaldy.
