Qyzylorda oblysynda 10-15 myń gektarǵa júgeri egiledi

QYZYLORDA. KAZINFORM — Qyzylordalyq dıqandar sáýir aıynyń úshinshi onkúndiginde kúrish egýge kirisedi. Bul týraly oblystyq aýyl sharýashylyǵy jáne jer qatynastary basqarmasy málimdedi.

Bıyl kóktemgi egis úshin 20,4 myń tonna kúrish tuqymy quıyldy. Syr salysynan basqa 1570,9 tonna dándi, 170,4 tonna maıly, 289 tonna mal azyǵy túrindegi daqyldardyń tuqymy daıyndaldy. Egis bastalǵansha tuqym sapasy sebý dárejesine jetkiziledi.

— Bıyl 185,8 myń gektar jerge aýyl sharýashylyǵy daqyldary egiledi. Negizgi daqyl — kúrishtiń kólemi 10,9 myń gektarǵa qysqaryp, 70 myń gektarǵa ornalastyrylady. Qysqarǵan kúrishtiń ornyna júgeri daqylynyń egis kólemin ulǵaıtý týraly sheshim qabyldandy. Qyzylorda qalasy jáne aýdan ákimdikteriniń málimetine sáıkes bıyl júgeri daqylynyń egis kólemin 10-15 myń gektarǵa jetkizý josparlanyp otyr. Sáýir aıynda Memleketaralyq sý sharýashylyǵyn úılestirý komıssııasynyń otyrysynda sý lımıti bekitilgennen keıin egis kólemi qaıta naqtylanady, — dedi basqarma basshysy Talǵat Dúısebaev.

Aýyl sharýashylyǵyna sý únemdeý tehnologııasyn keńinen engizý úshin 2026 jylǵa 10 mlrd teńgege jýyq qarjy bólindi.

Memlekettik qoldaý esebinen mundaı tehnologııa paıdalanylatyn aýmaq 16 myń 700 gektarǵa ulǵaımaq.

— Sý únemdeý baǵytynda bıyldan bastap Jalaǵash, Shıeli, Jańaqorǵan, Qarmaqshy aýdandarynda 6 ınvestıtsııalyq joba iske asyrylady. Ótken jyly dıqandar kúrishtiń 60 myń gektaryn lazerlik tegisteýden ótkizse, bıyl bul kórsetkishti 65 myń gektarǵa jetkizý josparlanǵan, — dedi basqarma basshysy.

Eske salaıyq, Qyzylorda oblysynda aýyl sharýashylyǵy daqyldaryn ósirý jáne olardy tereń óńdeýge baǵyttalǵan iri agrarly joba júzege asyrylyp jatyr.