Qyzylorda oblysy ákiminiń birinshi orynbasary taǵaıyndaldy

QR Prezıdenti Ákimshiliginiń kelisimimen jáne oblys ákiminiń ókimimen Janalınov Danııar Erenǵalıuly Qyzylorda oblysy ákiminiń birinshi orynbasary laýazymyna taǵaıyndaldy, dep habarlaıdy Kazinform.

D. Janalınov 1975 jyly Almaty oblysynda dúnıege kelgen. Qazaq kólik jáne kommýnıkatsııa akademııasyn «Injener-ekonomıst» mamandyǵy boıynsha bitirgen.

Eńbek jolyn 2000 jyly Almaty oblysy Taldyqorǵan qalasy boıynsha salyq komıtetiniń salyq ınspektory bolyp bastaǵan.

2002-2010 jyldary Almaty oblysy boıynsha salyq komıtetinde salyq ınspektory, jetekshi, bas salyq ınspektory, bólim basshysy jáne departament bastyǵynyń orynbasary qyzmetterin atqarǵan.

2010-2014 jyldary QR Qarjy mınıstrligi Salyq komıtetiniń basqarma basshysy, 2014-2018 jyldary QR Qarjy mınıstrligi Memlekettik kirister komıtetiniń Soltústik Qazaqstan oblysy boıynsha departamentiniń basshysy, 2018-2021 jyldary Mańǵystaý oblysy boıynsha memlekettik kirister departamentiniń basshysy bolǵan.

2021-2022 jyldary QR Qarjy vıtse-mınıstri. 2022 jyldyń tamyz aıynan bastap QR Qarjy mınıstrligi Memlekettik kirister komıtetiniń tóraǵasy, 2023 jyldyń qyrkúıek aıynan beri oblys ákiminiń orynbasary qyzmetterin atqaryp keldi.

Eske salsaq, budan buryn Qyzylorda qalasynyń ákimi taǵaıyndaldy.