Qyzylorda qalasyna 14 qazanda «Shahmat kerýeni» keledi

«Shahmat kerýeni» 14 qazan kúni Qyzylordanyń úzdik oıynshylaryn anyqtaıdy, dep habarlaıdy Kazinform.

Qazaqstan shahmat federatsııasynyń aımaqtardaǵy ıntellektýaldy sport túrin damytý úshin qolǵa alǵan jobasyna Freedom Broker kompanııasy bas demeýshilik jasap otyr.

Bir aıda Qazaqstannyń 12 aımaǵynda týrnır ótkizgen kerýenniń kelýine oraı saǵat 10:00-de Ortalyq alańda saltanatty shara ótedi.

Shara barysynda shahmat federatsııasynyń oblystyq fılıaly ashylyp, shveıtsarlyq júıe boıynsha 11 kezeńnen turatyn blıtsten týrnır ótedi. Shahmat dodasynda 20 adam baq talastyrady. Olardyń arasynan úsh jeńimpaz ǵana grand-fınalǵa joldama alady.

Odan bólek, jartylaı fınaldyń 3 qatysýshysy «Áıelder arasyndaǵy úzdik nátıje», «16 jastan kishi úzdik oıynshy» jáne «50 jastan asqan úzdik qatysýshy» atalymdary boıynsha marapattalyp, aqshalaı sertıfıkattarǵa ıe bolady.

Týrnırden keıin kerýenniń qurmetti qonaǵy, jasóspirimder jáne jastar arasynda 8 dúrkin Qazaqstan chempıony, halyqaralyq deńgeıdegi shahmat sheberi Ásel Serikbaı bir mezettik oıyn seansyn ótkizedi. Seansqa aldyn-ala tirkelgen 10 áýesqoı shahmatshy qatysa alady.

Aıta ketsek, qarasha aıynda Túrkistanda ótetin grand-fınalda 60 oıynshy arasynan oza shapqan jeńimpaz 5 mıllıon teńgeni óz qanjyǵasyna baılaıdy. Al kerýenniń jalpy júlde qory 16 mıllıon teńgeni quraıdy.