Qytaılyq zaýyt 76 sekýndta bir energetıkalyq kólik qurastyrady — sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Ózbekstanǵa týrıst qaı elderden eń kóp keletini belgili boldy — ÓzA
2025 jyldyń qańtar–mamyr aılary aralyǵynda Ózbekstanǵa 4,2 mıllıon sheteldik týrıst kelgen. Bul kórsetkish byltyrǵy jyldyń osy kezeńimen salystyrǵanda 48,2 paıyzǵa artyq.
Ulttyq statıstıka komıteti kelýshilerdiń basym bóligi kórshi memleketterden ekenin málimdedi. Atap aıtqanda, eń kóp týrıst Qyrǵyzstannan kelgen — 1,2 mıllıon adam.
Bul týraly osy aptada «ÓzA» aqparat agenttigi málimdedi.
Habarlamada aıtylǵandaı, odan keıingi oryndarda Tájikstan (993,7 myń), Qazaqstan (889,6 myń), Reseı (334,3 myń) jáne Aýǵanstan (199,2 myń) qatarly elderden týrıster keledi eken.
Atalǵan BAQ-tyń dereginshe, saıahatshylar Ózbekstannyń tarıhı-mádenı kórneki oryndaryna qyzyǵýshylyq tanytqan.
Sondaı-aq osy aptada «ÓzA»-da «Ózbekstan eń qaýipsiz elder reıtınginde 25-orynǵa ıe boldy» degen taqyryptaǵy aqparat jarııalandy.
Dúnıejúzindegi eń qaýipsiz elder tiziminde Birikken Arab Ámirlikteri (BAÁ) kósh bastap tur. Bul el jeke qaýipsizdik pen qoǵamdyq ortanyń jalpy turaqtylyǵy úshin joǵary baǵalanǵan.
Ózbekstandyq aqparat kóziniń dereginshe, 2025 jylǵa arnalǵan Numbeo taldamalyq platformasynyń jańartylǵan reıtınginde álemniń eń qaýipsiz elderi men óńirleri jarııalandy.
Jańa esepke sáıkes, BAÁ birinshi oryndy ıelense, ekinshi orynda Andorra, úshinshide Qatar ornalasqan. Ózbekstan bul tizimde 25-orynǵa jaıǵasypty.
Aıta keteıik, eń qaýipsiz elder men óńirlerdiń alǵashqy ondyǵynda, Birikken Arab Ámirlikteri, Andorra, Qatar, Taıvan, Makao, Oman, Men araly, Gonkong, Armenııa jáne Sıngapýr qatarly elder bar.
Atalǵan elderde qylmys deńgeıi tómen, turǵyndardyń quqyq qorǵaý organdaryna senimi joǵary, ishki ahýal turaqty.
Al basqa elderdiń (TMD elderi — avt.) oryndary mynadaı: Ázerbaıjan — 35-oryn, Reseı — 52-oryn, Qazaqstan — 73-oryn, Ýkraına — 81-oryn, Qyrǵyzstan — 101-oryndy ıelense, Túrikmenstan men Tájikstan reıtıngke enbegen.
Aıta ketý kerek, bul aqparatta eń qaýipti elder tizimi de jarııalanǵan.
Eske sala keteıik, bul málimetter resmı memlekettik statıstıkaǵa emes, saýalnamaǵa qatysqandardyń sýbektıvti qabyldaýyna negizdelgen.
Ózbekstan Qazaqstandy shamamen 30 jyldan keıin qýyp jete alady — Eurasia Today
Ózbekstan shamamen 30 jyldan keıin Qazaqstandy ekonomıka salasynda qýyp jete alady.
Bul týraly ózbekstandyq ekonomıst Behzod Hoshımov YouTube jelisindegi Cactuz podkastynda málimdegen.
Ol Ózbekstannyń ekonomıkalyq kórsetkishterimen Qazaqstandy qýyp jetýi qıyn bolatynyn aıtqan.
Bul týraly osy aptada Qyrǵyzstanda shyǵatyn Eurasia Today aqparat agenttigi habarlady.
Atalǵan BAQ-tyń keltirgen derekterine súıensek, Behzod Hoshımov damyǵan jáne kedeı elderdiń ekonomıkalyq ósimi arasynda aıtarlyqtaı alshaqtyq bar ekenin tilge tıek etken.
Ol mysal retinde AQSh pen Ózbekstannyń jan basyna shaqqandaǵy jalpy ishki óniminiń arasyndaǵy aıyrmashylyq óte úlken ekenin aıtady.
Ekonomısttiń pikiri boıynsha, Ózbekstan úshin jylyna 5 paıyzdyq ekonomıkalyq ósý qarqynymen joǵary nátıjege jetý qıyn. Eldiń ekonomıkasy kem degende 8 paıyzǵa ósýi kerek.
— Olaı bolsa, shamamen 30 jyldan keıin biz Qazaqstandy qýyp jete alamyz. Qazaqstanda jan basyna shaqqandaǵy tabys bizdikinen 5-6 ese joǵary. Bizdiń kedeı bolǵanymyz sonsha, tabysymyz alty ese ósse, ıaǵnı árbir ózbektiń tabysy birdeı mólsherde ósse, biz Qazaqstandy qýyp jetemiz. Tipti, jan basyna shaqqandaǵy ishki jalpy ónimimiz 5 paıyzdan astam ósse de, 10 jyldan keıin Qazaqstandy qýyp jetýimiz ekitalaı. Tipti, Ózbekstannyń álemde ortasha tabysqa ıe elderdiń qataryna enýi kóp kúmán týdyrady. Bárinen buryn turaqty ekonomıkalyq ósimniń 5 paıyz deńgeıinde bolýynyń ózi neǵaıbil, — deıdi Behzod Hoshımov.
Barkól qazaq avtonomııaly aýdanynda áýejaı ashyldy — CNR
Shyńjańnyń 28-inshi azamattyq kólik áýejaıy qoldanysqa berildi.
15 shildede Chýntsınnen Barkólge tikeleı ushqan Huaxia Airlines áýekompanııasynyń G54215 reısi Shyńjańnyń Qumyl aımaǵy Barkól aýdanyna kelip qondy.
Bul týraly osy aptada Qytaıdyń «Ortalyq halyq radıosy» habarlady.
Bul Barkól Dahy áýejaıynyń resmı ashylǵanyn bildiredi. Barkól qazaq avtonomııaly aýdanyndaǵy jańa áýejaı Shyńjańda paıdalanýǵa berilgen 28-inshi halyqtyq áýejaı jáne ekinshi ústirt áýejaıy, dep jazady qytaılyq BAQ.
Aıta keteıik, Barkól qazaq avtonomııalyq aýdany Qytaıdyń Shyńjań Uıǵyr avtonomııalyq ólkesindegi Qumyl aımaǵyna qarasty aýdan.
Barkól 1954 jyly avtonomııalyq aýdan bolyp qurylǵan.
Qytaıda Іle qazaq avtonomııalyq oblysynan tys Morı qazaq avtonomııalyq aýdany, Barkól qazaq avtonomııalyq aýdany jáne Gansý ólkesinde Aqsaı qazaq avtonomııalyq aýdany qatarly úsh qazaq avtonomııalyq aýdan bar.
Qytaılyq avtozaýyt 76 sekýndta bir energetıkalyq kólik qurastyryp jatyr — «Halyq gazeti»
Xiaomi avtomobıl zaýyty Beıjińniń ekonomıkalyq jáne tehnologııalyq damý aımaǵynda ornalasqan. Zaýyt 700 000 sharshy metrden astam aýmaqty alyp jatyr. Bul 100 fýtbol alańy kólemine para-par alpaýyt zaýytta ár 76 sekýnd saıyn bir jańa energetıkalyq kólik qurastyrylady, dep habarlaıdy «Halyq gazeti» basylymy.
Atalǵan basylymnyń málimetinshe, Xiaomi sońǵy bes jylda zertteýler men ázirlemelerge 100 mıllıard ıýannan astam ınvestıtsııa salǵan jáne negizgi múmkindikterin tıimdi qoldanýy arqasynda úlken jetistikterge qol jetkizgen. Kompanııa aldaǵy bes jylda jahandyq tehnologııalardyń jańa býynyn shyńyna jalǵasty umtylý úshin taǵy 200 mıllıard ıýan ınvestıtsııalaýdy josparlap otyr.
BRICS telearnasynyń arnaıy syılyǵy berildi — ParsToday
Úndistan ókiline úshinshi ret uıymdastyrylǵan «Eýrazııa jasyl klımat» halyqaralyq baıqaýynda BRICS TV jelisiniń arnaıy júldesi tabys etildi, dep jazdy ParsToday aqparat agenttigi.
ParsToday agenttiginiń BRICS telearnasyna silteme jasap habarlaýynsha, «Jasyl klımat Eýrazııa» úshinshi halyqaralyq baıqaýynyń jabylý saltanatynda Úndistannyń Qorshaǵan ortany qorǵaý qory (EFI) 603 qaraýsyz qalǵan sý joldaryn qalpyna keltirgeni jáne jer asty sýlarynyń qoryn jaqsartqany úshin BRICS telearnasynyń arnaıy syılyǵyn aldy.
Aıta keteıik, Eýrazııalyq ekonomıkalyq komıssııanyń qoldaýymen ótken sharada 16 elden 295 joba baǵalandy.
EFI negizin qalaýshy Arýn Chela Krıshnamýrtı TV BRIKS-ten bul arnaıy syılyqty alý erekshe yntalandyrady degen.
Onyń aıtýynsha, bul marapat bizdiń tynymsyz eńbegimiz ben tirshilik etý ortasyn qalpyna keltirýge ǵylymı kózqarasymyzdy kórsetedi jáne jahandyq ońtústiktegi ekologııalyq máselelerge álemniń nazary aýady.
Ystanbul áýejaıy álemniń eń úzdik áýejaıy bolyp tańdaldy — TRT
Ystanbul áýejaıy «Travel + Leisure» jýrnaly tarapynan qatarynan ekinshi ret álemniń eń úzdik áýejaıy bolyp tańdaldy. Áýejaı eki jyl buryn 7-orynda bolsa, qazir kósh bastap tur, dep habarlaıdy Túrkııa Radıo Televızııa portaly.
«TRT»-nyń málimetinshe, Eýropanyń eń iri áýejaıy sanalatyn Ystanbul áýejaıy tanymal saıahat jýrnaly «Travel + Leisure» júrgizgen saýalnama nátıjesi boıynsha qatarynan ekinshi ret álemdegi eń úzdik áýejaı retinde tańdalǵan.
Áýejaıdyń kórsetkishi ótken jylmen salystyrǵanda joǵarylap, 95,79-dan 98,57-ge deıin ósken. 2023 jylǵy saýalnamada 83,36 oqyrman upaıymen jetinshi oryndy ıelengen Ystanbul áýejaıynyń bıylǵy jetistigi «Travel + Leisure» jýrnaly tarapynan «erekshe áserli kórsetkish» dep sıpattaldy.
Túrkııalyq basylymnyń dereginshe, áýejaılar «Travel + Leisure» jýrnalynyń oqyrmandary tarapynan qoljetimdilik, tirkelý tájirıbesi, qaýipsizdik, tamaqtaný, saýda jáne dızaın sııaqty ólshemder boıynsha baǵalandy.