Qytaılyq kompanııa sý sharýashylyǵy salalaryndaǵy jobalarǵa qatysýǵa qyzyǵýshylyq tanytty

ASTANA. KAZINFORM – Premer-Mınıstrdiń orynbasary Qanat Bozymbaev pen Power China Chengdu Engineering Corporation dırektorlar keńesiniń tóraǵasy He ıAnfen energetıka jáne sý resýrstary salalaryndaǵy ózara tıimdi yntymaqtastyqty keńeıtý perspektıvalaryn talqylady.

Power China Chengdu — jobalaý men ınvestıtsııalaýdan bastap qurylys pen paıdalanýǵa berýge deıingi tolyq qyzmetter tsıklyn usynatyn álemdegi jetekshi kompanııalardyń biri.

Búginde Power China Chengdu Qazaqstanda birqatar iri jobalardy iske asyrdy: «Moınaq» sý elektr stantsııasy, «Jańatas» jáne «Shelek» jel elektr stantsııalary. Qazirgi tańda «Hromtaý» jáne «Arqalyq» jel elektr stantsııalaryn iske qosýǵa daıyndyq júrgizilýde.

Kelissózder barysynda qytaılyq tarap ırrıgatsııa jáne sý sharýashylyǵy salalaryndaǵy jobalarǵa qatysýǵa qyzyǵýshylyq tanytty. Óz kezeginde Qanat Bozymbaev eldegi iri ınfraqurylymdyq jobalar týraly aıtyp ótti, olardyń qatarynda Alataý qalasynyń qurylysy men kommýnaldyq jáne energetıkalyq sektorlardy jańǵyrtý jónindegi Ulttyq joba bar.

Kadr daıarlaý máselesine erekshe nazar aýdaryldy. Qanat Bozymbaev taraptardyń birlesken jumysynyń mańyzdy baǵyttarynyń biri retinde Taraz qalasyndaǵy Qazaq ulttyq sý sharýashylyǵy jáne ırrıgatsııa ýnıversıtetiniń bazasynda jas mamandardy daıarlaý týraly aıtty.

Kezdesý sońynda taraptar birlesken bastamalardyń áleýetin atap ótip, yntymaqtastyqty odan ári nyǵaıtýǵa ózara nıetterin rastady.

Aıta keteıik, amerıkalyq Lindsay Corporation Qazaqstanda ırrıgatsııalyq jabdyqtardy qurastyrýmen aınalyspaq.