Qytaıdyń ıAntszy ózeninde delfın kóbeıdi
ASTANA. KAZINFORM – Resmı derekke sáıkes, ıAntszy alabyndaǵy ózen delfıniniń sany 2025 jyly 1,426 basqa jetti. Bul kórsetkish 2022 jyldaǵydan 177 bas artyq.
Lianhe Zaobao basylymynyń habarlaýynsha, Qytaı Aýyl sharýashylyǵy jáne aýyl isteri mınıstrliginiń ókili 30 qańtarda ótken baspasóz máslıhatynda ıAntszy ózeninde engizilgen «balyq aýlaýǵa on jyl qatarynan tyıym salý» sharasynyń aralyq qorytyndysyn tanystyrdy. Onyń aıtýynsha, tyıym tolyqtaı iske qosylǵannan keıingi bes jyldyń ishinde ózen alabyndaǵy bıoártúrlilikti qalpyna keltirý úderisi turaqty túrde jaqsaryp, ıAntszy ekologııasy qaıta jandana bastaǵan.
Mınıstrlik ókili 2025 jyly júrgizilgen arnaıy zertteý nátıjelerine toqtaldy.
– Arnaıy sanaq ıAntszy ózenindegi delfınderdiń sany 1,426 basqa jetkenin kórsetti. Bul 2022 jylǵy derektermen salystyrǵanda 177 basqa artyq. Búginde olar ıAntszy ekojúıesin qorǵaýdyń mańyzdy ekologııalyq sımvolyna aınaldy – dedi vedomstvo ókili.
Sondaı-aq onyń málimdeýinshe, 2021–2025 jyldar aralyǵynda ıAntszy alabynda barlyǵy 351 balyq túri tirkelgen. Bul balyq aýlaýǵa jappaı tyıym salynǵanǵa deıingi kezeńmen salystyrǵanda 43 túrge kóp. Osy ýaqyt ishinde balyqtardyń usaqtalý úrdisi aıtarlyqtaı tejelip, sý ekojúıesiniń bıotıkalyq tutastyq ındeksi edáýir artqan.
Aıta keteıik, 2021 jylǵy 1 qańtardan bastap ıAntszy ózeniniń negizgi sý aıdyndarynda balyq aýlaýǵa jappaı tyıym salý rejımi engizilip, merzimi on jylǵa belgilengen bolatyn. ıAntszy ózeni delfıni – qazirgi tańda alapta tirshilik etetin birden-bir kıttektes sútqorekti.
Ashyq derekkózderge sáıkes, Qytaı ónerkásibiniń qarqyndy damýy ıAntszy ózeniniń ekojúıesine eleýli zalal keltirgen. Sonyń saldarynan ıAntszy ózeni delfınderiniń popýlıatsııasy qıyn jaǵdaıǵa tap bolǵan. 2013 jyldan keıin Halyqaralyq tabıǵatty qorǵaý odaǵynyń (IUCN) Qyzyl kitabynda onyń mártebesi joıylyp bara jatqan túrler (CR) retinde baǵalanyp keledi. 2017 jyldyń mamyr aıynda Qytaıdyń Aýyl sharýashylyǵy jáne aýyl isteri mınıstrligi ıAntszy ózeniniń delfınin I sanatty qorǵalatyn janýarlar tizimine engizdi.
Buǵan deıin Qytaıdyń Tıbet jotasynda ıhtıologtar balyqtyń jańa túrin anyqtap, oǵan Glaridoglanis verruciloba degen resmı ataý bergenin jazyp edik.