Qytaıdyń Sıan qalasynda «Ortalyq Azııa saıabaǵy» ashyldy
ASTANA. KAZINFORM - Qytaıdyń Sıan qalasynda 19 mamyrda «Ortalyq Azııa saıabaǵy» resmı túrde ashyldy.
«Chinanews» habarlaýynsha, bul saıabaqty salýdaǵy maqsat - Sıan qalasynda Qytaı men Ortalyq Azııa arasyndaǵy mádenı almasýlardy, týrızmdi ilgeriletýdi, ekonomıkalyq jáne saýda kelissózderin biriktiretin jańa platformadaǵy hab qurý bolmaq.
Búkil saıabaq shamamen 54 gektar aýmaqty alyp jatyr. Saıabaqtyń taqyryptyq dızaıny «jasyl, ashyq, ınklıýzıvti, ınnovatsııalyq jáne tabıǵatty saqtaý» tujyrymdamalaryna negizdelgen jáne Ortalyq Azııanyń kóptegen mádenı elementterin biriktiredi.
Saıabaq kórkem kórinis aımaǵy, iskerlik konferentsııa alańy, Ortalyq Azııa ónimderiniń kórme zaly jáne Ortalyq Azııa taǵamdar alańy sııaqty ártúrli aımaqtarmen jabdyqtalǵan.
Ortalyq Azııa ónimderiniń kórme zalynda Ortalyq Azııa elderiniń 1000-nan astam ónimi qoıylyp, satylady.
19 mamyr – «Sıan Ortalyq Azııa saıabaǵynyń» ashylýynyń birinshi kúni. Qytaılyq BAQ kózderi kóptegen Sıan turǵyndarynyń saıabaqqa baryp, Taýar satyp alyp jatqansn habarlady.
Ortalyq Azııa taýarlary, sondaı-aq osy elderdiń erekshe mádenıetteri qytaı halqynyń úlken qyzyǵýshylyǵyn týdyrýda. Saıabaqta qurylǵan Ortalyq Azııa týrıstik qyzmet kórsetý ortalyǵynda kóptegen adamdar Ortalyq Azııa elderine saıahattaý úshin qalaı barýǵa bolatyny týraly keńes alyp jatyr.
Chinanew news habarlaǵandaı, Sıan «Ortalyq Azııa saıabaǵyn» Ortalyq Azııa elderimen mádenı almasý úshin brend alańyna aınaldyrýdy jáne Qytaı men Ortalyq Azııanyń bes eliniń mádenı baılanystaryn ilgeriletýdi josparlap otyr.