Qytaıdyń mańyzdy saıası oqıǵasy – «Eki jınalys» Beıjińde ótip jatyr
BEIJІŃ. KAZINFORM – Ádettegideı naýryz aıynda Qytaıdyń jyl saıynǵy mańyzdy saıası oqıǵasy – «Eki jınalys» dúısenbi kúni el astanasynda bastaldy.
«Eki jınalys» degen ne?
«Eki jınalys» — qytaı tilinen aýdarǵanda, 1959 jyldan beri ár naýryz aıynda ótkiziletin Qytaı Halyq Respýblıkasynyń Búkilqytaılyq halyq ókilderi jınalysy men Qytaı Halyqtyq saıası konsýltatıvtik keńesi Ulttyq komıteti jınalysynyń jıyntyq ataýy.
Qytaıdyń zań shyǵarýshy organy otyrysynyń kún tártibi retinde «Eki jınalys» shamamen 2 aptaǵa sozylady. Іs-sharaǵa Qytaıdyń saıası elıtasy, sondaı-aq bıznes, tehnologııa, medıa jáne óner áleminiń kóshbasshylary jınaldy.
Bul kezeńde zań shyǵarýshylar jańa zańdardy, saıası taǵaıyndaýlardy jáne ártúrli vedomstvodaǵy, sonyń ishinde Qarjy mınıstrligi men Ulttyq damý jáne reformalar jónindegi komıssııadaǵy jumys barysyn egjeı-tegjeıli sıpattaıtyn úkimet jumysynyń esepterin bekitedi.
Bıylǵy «Eki jınalysta» ne nársege nazar aýdarǵan jón?
Ótken jylǵy «Eki jınalysta» Qytaıdyń «halyq ókilderi» (parlament múshelerine teń) Sı Tszınpınniń Qytaı Halyq Respýblıkasynyń tóraǵasy bolyp úshinshi ret qaıta saılanýyn resmı túrde maquldady. Bul — Qytaı tarıhynda buryn-sońdy bolmaǵan oqıǵa.
Bıyl Qytaı ekonomıkasyna keleńsiz faktorlardyń yqpalynan qalaı qutylyp, turaqty ósýdi jalǵastyrý basty nazarda bolmaq.
Eń mańyzdy oqıǵalardyń biri — premer-mınıstr Lı Tsıanniń jyl saıynǵy jumysy týraly esebi, onda úkimettiń jetistikteri saraptalyp, 2024 jylǵa arnalǵan maqsattar belgilenedi. Lı Tsıan 2024 jyly shamamen 5% ekonomıkalyq ósý maqsatyn belgilep, Qytaıdaǵy týý deńgeıiniń tómendeýinen bastap tehnologııa men jasandy ıntellektti retteýdiń bolashaǵyna deıingi negizgi máselelerdi talqylaıdy dep kútiledi.
«Eki jınalys» barysynda keıbir negizgi personaldy taǵaıyndaýlar da jasalýy múmkin.
Aıta keteıik, ótken jyly Búkilqytaılyq halyq ókilderi jınalysy Turaqty komıtetiniń 175 múshesiniń 11-i qyzmetinen bosatylǵan, onyń ishinde Syrtqy ister mınıstri Tsın Gang men Qorǵanys mınıstri Lı Shanfý bar. Jumystan shyǵarylǵan múshelerdiń kópshiligi Qytaı áskerimen tyǵyz baılanysta.
Qytaı men Taıvan arasyndaǵy qarym-qatynas osy «Eki jınalysyndaǵy» taǵy bir mańyzdy baǵyty bolǵaly týr.
Ótken aıda bolǵan «Taıvan jumys 2024» konferentsııasynda Qytaı halyqtyq saıası konsýltatıvtik keńesi ulttyq komıtetiniń tóraǵasy Van Hýnıng buryn qoldanylǵan «Taıvannyń táýelsizdik jarııalaýyna qarsy turamyz» degen málimdemesin birinshi ret «Taıvannyń táýelsizdik jarııalaýyna qatań týrde soqqy berý» dep ózgertti. Semantıkalyq jańartý syrtqy álemdi «Bul Qytaıdyń 2024 jyly Taıvanǵa qatysty qatal saıasat ustanatynyn bildire me?» dep alańdatty.
Otyz jylǵa sozylǵan «dástúr» joıylady
Qytaı aqparat quraldarynyń habarlaýynsha, premer Lı Tsıan bıylǵy Búkilqytaılyq halyq ókilderi jınalysynan keıin BAQ ókilderimen kezdespeıdi. Qytaı Halyq Ókilderi Búkilqytaılyq jınalysynyń baspasóz hatshysy Lý Tsıntszıan 4 naýryzda Beıjińde:
«Bıylǵy HIV Búkilqytaılyq halyq ókilderi jınalysynyń ekinshi sessııasy jabylǵannan keıin premer-mınıstrdiń baspasóz máslıhaty bolmaıdy. Erekshe jaǵdaılar bolmasa, osy Búkilqytaılyq halyq ókilderi jınalysynyń aldaǵy birneshe jylynda premer-mınıstrdiń baspasóz máslıhaty bolmaıdy», — dedi.
Bul 30 jyldyq dástúrge aınalǵan Qytaı premer-mınıstriniń «Eki jınalys» baspasóz konferentsııasy endi bolmaıdy degendi bildiredi.
1991 jyly Qytaıdyń sol kezdegi premer-mınıstri Lı Pen «Eki jınalys» aıaqtalǵannan keıin ótken baspasóz máslıhatyna alǵash ret qatysty. 1993 jyldan bastap premer-mınıstrdiń «Eki jınalys» kezindegi baspasóz máslıhaty qalypty jaǵdaıǵa aınalǵan.