Qytaıdyń Harbın qalasy AQSh agentterine izdeý jarııalady
ASTANA.KAZINFORM — Qytaıdyń Harbın qalasy kıbershabýyl uıymdastyrý men qupııa aqparattardy urlaýǵa qatysy bar degen kúdikpen AQSh-tyń arnaıy agentterine izdeý jarııalady.
Harbın qalalyq Qoǵamdyq qaýipsizdik basqarmasy 16 sáýir kúni Weibo áleýmettik jelisi arqyly jarııalaǵan resmı habarlamadan belgili bolǵandaı, 2025 jylǵy Harbınde ótken IX qysqy Azııa oıyndary kezinde, dúbirli dodanyń aqparattyq júıesi men Heılýntszıan provıntsııasynyń mańyzdy aqparattyq platformalaryna shetelden aýqymdy kıbershabýyl jasalǵan. Habarlamada tergeý nátıjesi AQSh Ulttyq qaýipsizdik agenttigi Arnaıy aqparattyq operatsııalar basqarmasynyń agentteri Keterın Ýılson, Robert Snellıng jáne Stıven Djonsonnyń atalǵan shabýyldarǵa qatysqanyn dáleldeıdi.
Habarlamada sondaı-aq atalǵan agentterdiń Qytaıdyń mańyzdy aqparattyq ınfraqurylymdaryna da san dúrkin kıbershabýyl uıymdastyrǵany jáne Huawei sııaqty kompanııalarǵa baǵyttalǵan kıbershabýylǵa da at salysqany qadap aıtyldy.
Habarlamaǵa sáıkes, Qytaıǵa qarsy kıbershabýyl jasaý jáne qupııa aqparattardy urlaý qylmystaryna zań boıynsha qatań soqqy berý, ulttyq kıberqaýipsizdikti saqtaý jáne halyqtyń ómiri men mal-múlkin qorǵaý maqsatynda Harbın qalalyq Qoǵamdyq qaýipsizdik basqarmasy atalǵan úsh kúdiktige halyqaralyq izdeý jarııalaý jáne tıisti syıaqy taǵaıyndaý týraly sheshim qabyldaǵan.
Sınhýa agenttiginiń habarlaýynsha, Qytaıdyń Kompıýterlik vırýstarǵa qarsy jedel sharalar jónindegi ulttyq ortalyǵynyń Kompıýterlik vırýstardyń aldyn alý tehnologııalary boıynsha ınjenerlik zerthanasy 3 sáýirde jarııalaǵan arnaıy esepke sáıkes, 2025 jyldyń 7-14 aqpany aralyǵynda Harbın qalasynda ótken IX qysqy Azııa oıyndary kezinde, alqaly sharanyń aqparattyq júıesi men Heılýntszıan provıntsııasynyń aqparattyq ınfraqurylymdaryna shetelden jalpy 270,167 ret hakerlik shabýyl jasalǵan. Anyqtalǵan shabýyldardyń 63,24%-y, atap aıtqanda 170,864-i AQSh-tan baǵyttalǵan.
Naýryz aıynda ІІM Kıberqylmysqa qarsy is-qımyl basqarmasy júrgizgen jedel-izdestirý sharalary barysynda iri kólemdegi alaıaqtyq deregi anyqtalǵanyn jazǵan edik.