Kýala-Lampýrda Qytaı men AQSh qandaı kelisim jasaǵany belgili boldy
ASTANA. KAZINFORM - Qytaıdyń Saýda mınıstrligi AQSh delegatsııalarymen beısenbi kúni Kýala-Lampýrda ótken saýda jáne ekonomıkalyq kelissózdiń qorytyndysymen bólisti, dep habarlaıdy Kazinform menshikti tilshisi.
Vedomstvo ókiliniń aıtýynsha, AQSh fentanılge salynatyn bajdy 10%-ǵa tómendetýge jáne Gonkong pen Makaonyń arnaıy ákimshilik aýdandarynan alynǵan ónimderdi qosa alǵanda, Qytaı taýarlarynan alynatyn ózara tarıfterdiń 24%-yn toqtata turýdy bir jylǵa uzartty.
Oǵan jaýap retinde Qytaı atalǵan amerıkalyq bajdarǵa qarsy jaýap sharalaryna tıisti túzetýler engizedi. Eki tarap ta tarıftik shekteýlerdiń birqatar erekshelikterin qoldanýdy uzartýǵa kelisti.
Sonymen qatar AQSh qyrkúıektiń 29-y kúni jarııalanǵan jańa erejeniń kúshine enýin bir jylǵa toqtatty. Erejede tizimdegi bir nemese birneshe uıymdarǵa tıesili 50%-dan astam kompanııalarǵa sýbektiler tizimi boıynsha eskporttyq shekteýler keńeıtiledi.
Al Qytaı buǵan jaýap retinde óziniń 9-shy qazan kúni jarııalaǵan eksportty baqylaý sharalaryn júzege asyrýdy bir jylǵa shegeredi jáne ony keıin pysyqtap, mehanızmderin naqtylaıdy.
Mınıstr ókiliniń aıtýynsha, amerıkalyq tarap Qytaıdyń teńiz, logıstıka jáne keme jasaý salalaryna qarsy baǵyttalǵan 301-shi bólim boıynsha tergeý sheńberinde kózdelgen sharalardy engizýdi bir jylǵa toqtatady.
Budan bólek, taraptar fentanıl aınalymyna qarsy kúrestegi yntymaqtastyq, aýyl sharýashylyǵy ónimderiniń saýdasyn keńeıtý, sondaı-aq jekelegen kompanııalardyń qyzmetine baılanysty jaǵdaılardy retteý sııaqty máseleler boıynsha qosymsha kelisimderge qol jetkizdi.
Eki jaq ta Madrıdtegi aldyńǵy ekonomıkalyq jáne saýda kelissózderiniń nátıjelerin rastady. AQSh ınvestıtsııa salasyna qatysty jaqsy kózqaras tanytty, al Qytaı TikTok qyzmetine qatysty máselelerdi syndarly túrde qarastyrýǵa daıyn ekenin málimdedi.
QHR Saýda mınıstrliginiń ókili Kýala-Lýmpýrdaǵy kelissózder teńdik, ózara qurmet pen tıimdilikke negizdelgen dıalog bolǵanyn rastaı otyryp, oń nátıjelermen aıaqtalǵanyn atap ótti. Onyń aıtýynsha, taraptardyń ashyq yntymaqtastyqqa daıyndyǵy kúrdeli máseleler boıynsha da sheshimderdi tabýǵa múmkindik beredi.
Ol qol jetkizgen kelisimder eleýli kúsh-jigerdiń nátıjesi bolǵanyn atap ótip, olardy is-júzinde júzege asyrý boıynsha birlesken jumysty jalǵastyrýǵa úmit bildirdi. Vedomstvo ókiliniń pikirinshe, bul ekijaqty ekonomıkalyq jáne saýda yntymaqtastyǵyna, sondaı-aq jalpy álemdik ekonomıkanyń turaqtylyǵyn qamtamasyz etedi.