Qytaıdyń adam beınesindegi robottary álemdik naryqty jaýlaı bastady

ASTANA. KAZINFORM — Robot óndirý salasyndaǵy Qytaıdyń jetekshi kompanııalarynyń biri Unitree Robotics jýyrda ótken jyly adam beınesindegi robottardyń naqty sany 5 500 danadan asqanyn jarııalady. Al serııalyq óndiris kólemi 6 500 birlikten kóp boldy, dep habarlaıdy Sınhýa.

Kompanııa bul kórsetkishterdiń «tapsyrystar sany emes, naqty satylyp, sońǵy tutynýshylarǵa jetkizilgen robottar sany» ekenin erekshe atap ótti. Bul tapsyrystar kólemi budan da joǵary bolýy múmkin ekenin bildiredi. 2026 jyly Qytaıda adam beınesindegi robottardyń satylymy 10 myń birlikten asady dep kútilip otyr. Bul ótken jylmen salystyrǵanda 125 paıyzǵa kóp.

Unitree Robotics kompanııasynyń damý joly Qytaıdaǵy adam beınesindegi robottar ındýstrııasynyń jalpy evolıýtsııasyn aıqyn kórsetedi. 2016 jyly qurylǵan bul kompanııa joǵary ónimdi tórt aıaqty robottardy ashyq túrde satqan álemdegi alǵashqy kásiporyn atandy.

2025 jyly adam beınesindegi robottar buryn-sońdy bolmaǵan jańa qyrlarynan tanyla bastady. Sala sarapshylary bul kórsetilimder jaı ǵana «tehnıkalyq trıýkter» emes ekenin atap ótedi.

— Bul qoıylymdar robottardyń naqty damýyn kórsetedi jáne belgili bir kommertsııalyq qundylyq qalyptastyra alady, — dedi Unitree Robotics kompanııasynyń negizin qalaýshy Van Sınsın.

2025 jyl salada adam beınesindegi robottardyń jappaı óndirisi bastalǵan alǵashqy jyl retinde keńinen moıyndalyp otyr. Qytaı Halyq Respýblıkasynyń Ónerkásip jáne aqparattandyrý mınıstrligi jarııalaǵan derekterge sáıkes, elde daıyn ónim shyǵaratyn 140-tan astam kásiporyn bar, olar adam beınesindegi robottardyń 330-dan astam modelin usynǵan.

Ótken jylǵy naýryz aıynda Qytaıda 5G tehnologııasynyń qoldaýymen adam beınesindegi robottar aqyldy zaýyttarda kópstanokty jáne kóptapsyrmaly stsenarıılerde birlesken oqytý úshin qoldanyla bastady.

— Jasandy ıntellekttiń yqpalymen adam beınesindegi robottar ındýstrııasy kútilgennen de jyldam damyp keledi, — dedi QHR Ónerkásip jáne aqparattandyrý mınıstriniń orynbasary Chjan ıÝnmın.

Onyń aıtýynsha, qytaılyq adam beınesindegi robottar búginde «turaqty tura alady, senimdi júre alady jáne jyldam júgire alady», bul olardyń «sahnadaǵy qozǵalystan» «zaýyttaǵy naqty jumysqa» kóshýin jedeldetip otyr. Sonymen qatar mınıstrlik halyqqa qyzmet kórsetý jáne óndiristik tapsyrmalardy oryndaý sııaqty joǵary qundylyqqa ıe qoldaný stsenarıılerin tereń zerdeleý arqyly adam beınesindegi robottardy jedel engizýge yqpal etpek, osylaısha jańa tehnologııalar men ónimder múmkindiginshe tezirek naqty qoldanysqa enedi.

Unitree Robotics kompanııasy onlaın jáne oflaın satý arnalaryn keńeıtip jatyr. Byltyrǵy 31 jeltoqsanda Beıjińdegi JD MALL saýda ortalyǵynda kompanııanyń eldegi alǵashqy fırmalyq dúkeni ashyldy. Onda tutynýshylar robot ónimderin synap kórip, sol jerde birden satyp ala alady. Buǵan deıin Unitree Robotics JD.com onlaın platformasynda resmı flagmandyq dúkenin ashyp, G1 jáne R1 adam beınesindegi robottaryn, Go2 robo-ıtin jáne ózge de ónimderin usynǵan.

Adam beınesindegi robottar ındýstrııasynyń ósý boljamdary aıryqsha áserli. QHR Ónerkásip jáne aqparattandyrý mınıstrligi 2027 jylǵa qaraı daıyn adam beınesindegi robottardyń jyldyq óndiris kólemin 1 mıllıon birlikke jetkizýdi maqsat etip otyr. Al Qytaı Memlekettik keńesi janyndaǵy Damý máselelerin zertteý ortalyǵynyń boljamynsha, 2030 jylǵa qaraı salanyń jalpy kólemi 400 mlrd ıýanǵa (shamamen 57,5 mlrd AQSh dollary), al 2035 jylǵa qaraı 1 trln ıýannan asady.

Qytaıda adam beınesindegi robottardyń jappaı óndirisiniń jyldam iske asýyna apparattyq jabdyqtaý tizbegindegi eleýli artyqshylyqtar yqpal etti. Sarapshylardyń aıtýynsha, óndiristik qýattardy qalypty keńeıtý, negizgi komponentterdi derbes baqylaý jáne ónimderdi standarttaý esebinen adam beınesindegi robottardyń ózindik quny aıtarlyqtaı tómendedi.

Van Sınsınniń aıtýynsha:
— Bizde óndiris pen jasaý salasynda artyqshylyqtar bar, al jahandyq jetkizý kólemi salystyrmaly túrde joǵary. Jaqsy jolǵa qoıylǵan óndiris pen apparattyq qamtamasyz etýdiń arqasynda qytaılyq robot óndirýshi kompanııalardyń shyǵyndary básekege qabiletti ári qoldaný shegi tómen.

Aıta keteıik, jýyrda japondyq Pepper roboty Gınnestiń rekordtar kitabyna endi. 

Al Qytaıdyń Xiaopeng Motors kompanııasy jańa býyndaǵy IRON robotyn tanystyrdy.

Sondaı-aq astanalyq oqýshylar ınklıýzııany damytýǵa arnalǵan jańa robot qurastyryp jatqanyn jazdyq.