Qytaıdan Qazaqstanǵa kelgen týrıster sany 78% kóbeıgen
ASTANA. KAZINFORM — 2024 jyly Qytaıdan Qazaqstanǵa 655 myń týrıst kelgen. Buǵan vızasyz rejımniń engizilýi jáne áýe reısteriniń artýy sebep boldy. Eki el arasyndaǵy týrıstik baılanystar týraly Týrızm jáne sport vıtse-mınıstri Erjan Erkinbaev aıtyp berdi.
2024 jyldyń kókteminde Beıjińde «Qytaıdaǵy Qazaqstan týrızmi jyly» saltanatty túrde ashyldy. Bul jaı ǵana sımvoldyq shara emes, Qytaı aýdıtorııasy arasynda Qazaqstan týrızmin keń kólemde ilgeriletýge baǵyttalǵan aýqymdy jumystyń bastamasy boldy.
Qazaqstandy qytaılyq saıahatshylarǵa jaqynyraq tanystyrý maqsatynda 37 túrli is-shara uıymdastyrylǵan.
− Nátıje kóp kúttirmedi jáne týrıster aǵyny birneshe esege artty. Ótken jyly Qytaıdan kelgen týrıster sany 655 myńǵa jetip, 2023 jylmen salystyrǵanda 78%-ǵa ósti. Buǵan vızasyz rejımniń engizilýi jáne áýe reısteriniń artýy sebep boldy. Bıyl Gýanchjoý — Almaty, Chendý — Almaty, Shanhaı — Almaty, Shanhaı — Shymkent, sondaı-aq Sıan — Shymkent baǵyttaryna jańa áýe marshrýttary ashylyp jatyr, − dedi vıtse-mınıstr Nazarbaev ýnıversıtetinde «Qola men Altyn adam — Qytaı-Qazaqstannyń mádenı baılanysy» forýmynda.
Al 29 mamyrda «Sıan — Almaty» baǵytyndaǵy alǵashqy týrıstik poıyz jolǵa shyqty. Bul bastama ekinshi «Ortalyq Azııa — Qytaı» sammıtimen tuspa-tus kelip, eki el arasyndaǵy mádenı jáne gýmanıtarlyq baılanystardy damytýǵa baǵyttaldy.
− Atalǵan sharalardyń barlyǵy Qazaqstan men Qytaı arasyndaǵy týrıstik aǵymdy odan ári arttyrýǵa yqpal etip otyr. 2025 jyldyń qańtar-mamyr aılary aralyǵynda Qytaıdan shamamen 280 myń týrıst kelgen, bul 2024 jyldyń osy kezeńimen salystyrǵanda 42%-ǵa artyq. Bir apta buryn Qazaqstanda Qytaı týrızmi jylynyń resmı ashylýyn ótkizdik. Al búgingi shara eki el qarym-qatynasynyń jańa kezeńge aıaq basqanyn bildiredi, − dedi E. Erkinbaev.
Aıta keteıik, Qytaıdyń Baotszı qalasy Qazaqstanmen úsh baǵytta yntymaqtastyqty arttyrýǵa nıetti.