Qytaıdaǵy órtten kelgen shyǵyn 570 mln dollardan asty
ASTANA. KAZINFORM – 2025 jyldyń birinshi jartyjyldyǵynda Qytaıda 552 myń órt oqıǵasy tirkeldi, dep habarlaıdy Kazinform agenttigi QHR Tótenshe jaǵdaılar mınıstrligine qarasty Órt qaýipsizdigi jáne qutqarý basqarmasyna silteme jasap.
Qańtar men maýsym aralyǵynda eldiń órt sóndirý jáne qutqarý bólimsheleri 1,242 mıllıon shaqyrtýǵa shyqqan. Bul ótken jyldyń sáıkes kezeńimen salystyrǵanda 7,7 paıyzǵa kóp. Júrgizilgen operatsııalardyń nátıjesinde 98 myń adam qutqarylyp, taǵy 47 myń adam evakýatsııalanǵan. Alaıda 1084 adam qaza taýyp, 1149 adam ártúrli dárejedegi jaraqat alǵan.
Baspasóz brıfınginde basqarmanyń resmı ókili Lıý Tszııan órt sanynyń ótken jylmen salystyrǵanda ózgerissiz qalǵanyn, ıaǵnı nebári 0,04 paıyzǵa artqanyn aıtty. Sonymen qatar, onyń aıtýynsha, qaza tapqandar sany 6,2 paıyzǵa, jaraqat alǵandar sany 16,9 paıyzǵa azaıǵan.
Jarty jyl ishinde órtten kelgen tikeleı ekonomıkalyq shyǵyn 4,08 mıllıard ıýan (shamamen 571,6 mıllıon dollar nemese 299,2 mıllıard teńge) bolǵan. Bul kórsetkish 2024 jyldyń sáıkes kezeńimen salystyrǵanda 9,3 paıyzǵa tómen.
Vedomstvo málimetinshe, órtterdiń negizgi sebepteri – elektr jelilerindegi aqaýlar, turmysta otpen abaısyz áreket jasaý, temeki shegý jáne qaraýsyz qalǵan ashyq ot kózderi.
Qytaıdyń órtke qarsy jáne qutqarý qyzmetteri órt qaýpin azaıtýǵa baǵyttalǵan keshendi sharalardy júzege asyrýdy jalǵastyryp jatyr. Ásirese, aýyldyq jerler men shaǵyn kommertsııalyq nysandardaǵy órttiń aldyn alýǵa erekshe mán berilýde, sebebi bul aımaqtarda órt shyǵý qaýpi joǵary.
Buǵan deıin biz Qytaıda tabıǵı apattardan kelgen shyǵyn 7,5 mıllıard dollardan asqany týraly habarlaǵan bolatynbyz.