Qytaıda zilzala qurbandarynyń sany 95-ke jetti

ASTANA.KAZINFORM  - Qytaıdyń Ortalyq telearnasy (CCTV) Sıtszan (Tıbet) avtonomııalyq aýdanynyń Shıgatsze qalasyndaǵy joıqyn jer silkinisinen qaza bolǵandar sany 95-ke jetkenin habarlady.

Shıgatsze qalalyq ákimdiktiń baspasóz qyzmetiniń habarlaýynsha, jergilikti ýaqyt boıynsha 7 qańtar kúni saǵat 17:00-ge deıin zilzala saldarynan 95 adam kóz jumyp, 130 adam túrli deńgeıde dene jaraqatyn alǵan.

CCTV-diń aıtýynsha, apatty aımaqta saǵat 17:00-ge deıin magnıtýdasy 3,0 jáne odan joǵary 19 márte jer dúmpýi tirkeldi. Onyń ishinde 4,0 - 4,9 baldyq jer silkinisi 3 ret, 3,0–3,9 baldyq jer silkinisteri 16 ret qaıtalandy. Eń kúshti aftershok jergilikti ýaqyt boıynsha saǵat 9:24-te Dınjı ýezinde tirkelgen (magnıtýdasy 4,4 bal). Bul dúmpý silkinistiń negizgi oshaǵynan shamamen 18 shaqyrym qashyqtyqta boldy.

Buǵan deıin Qytaıdyń Sıtszan avtonomııalyq aýdanynyń Shıgatsze qalasyndaǵy Dınjı ýezinde magnıtýdasy 6,8 baldyq jer silkinisi bolǵanyn habarlaǵan edik.

Qytaıdyń seısmologııalyq jeli ortalyǵynyń málimetinshe, jer silkinisiniń oshaǵy soltústik endiktiń 28,50 gradýsy men shyǵys boılyqtyń 87,45 gradýsynyń koordınatasynda ornalasqan. Gıpotsentr 10 km tereńdikte.