Qytaıda jańa jahandyq teńiz ekspedıtsııasy bastaldy

ASTANA. KAZINFORM — Qytaıdyń ońtústigindegi Gýandýn provıntsııasynyń Shenchjen qalasyndaǵy Shekoý portynan 4500 tonnalyq zertteý kemesi jolǵa shyqty, dep habarlaıdy Sınhýa.  

Bul halyqaralyq yntymaqtastyqty damytýǵa jáne teńiz zertteýlerine jurtshylyqty tartýǵa baǵyttalǵan 10 jyldyq jahandyq teńiz ekspedıtsııasy men ǵylymı baǵdarlamanyń bastalýy boldy.

Ekspedıtsııanyń birinshi kezeńi Ońtústik Qytaı teńiziniń soltústik bóligindegi Shenhý aımaǵyn qamtıdy. Ol 3 qarashada aıaqtalady. Zertteý jumystary teńiz geologııasy, geofızıkasy, geohımııasy jáne bıologııasy sııaqty salalardaǵy zertteýler úshin derektermen qamtamasyz etetin teńiz sýynyń synamasyn alýdy, jaǵalaýdaǵy shógindilerdi zertteýdi jáne tereń teńiz sýyn synaýdy qamtıdy.

Zertteýler Qytaı jobalap, qurastyrǵan «Sıanıanhýn-10» kemesiniń bortynda júrgizilip jatyr.

«Tuńǵıyq teńizige saıahat - 2035» dep atalatyn ekspedıtsııany Qytaıdyń teńizdegi mıneraldy resýrstardy barlaý jáne ıgerý qaýymdastyǵy, Ońtústik ǵylym jáne tehnologııa ýnıversıtetiniń Muhıt ǵylymy men tehnologııasynyń joǵary ınstıtýty jáne basqa da birneshe ınstıtýt bastady.

Baǵdarlama aldaǵy 10 jyl ishinde teńizde ozyq tehnologııalardy synaý jáne ınnovatsııalyq azamattyq ǵylymı jobalardy júzege asyrý úshin kásiporyndar, jahandyq seriktester jáne qoǵammen yntymaqtasady.

Aıta keteıik, Qytaı 2030 jylǵa qaraı óz ǵaryshkerlerin Aıǵa ushyrýdy josparlap otyr.