Qytaıda jańa energetıkalyq kólikterdiń jyldyq óndirisi 10 mıllıonnan asty - Sheteldegi qazaq baspasózi
Kazinform HAA tilshisi sheteldegi qazaq tilinde taraıtyn aqparat kózderine aptalyq sholýyn usynady.
Qazaqstan men Qytaı ǵalymdary birigip ǵylymı eńbekter jınaǵyn shyǵardy - «Halyq gazeti»
13 qarasha kúni Almatydaǵy Dostyq úıinde Qytaı men Qazaqstan ǵalymdary birlesip qurastyrǵan «Ádiletti Qazaqstan jáne Qytaı armany: zamanaýı damý strategııasynyń múmkindikteri men bolashaǵyna taldaý» atty akademııalyq maqalalar jınaǵy jarııalandy. Sharaǵa eki elden 80-ge tarta maman qatysty, dep habarlaıdy «Halyq gazeti» basylymy.
Qytaılyq BAQ-tyń dereginshe, maqalalar jınaǵyn qos eldiń saıasat, ekonomıka, halyqaralyq qatynastar, tarıh jáne mádenıet sııaqty túrli saladaǵy 30-dan astam sarapshylary men ǵalymdary birlesip jazǵan. Kitap úsh taraýdan turady. Onda Qytaı men Qazaqstan yntymaqtastyǵynyń jańa jetistikterine sholý jasalyp, qazirgi halyqaralyq jaǵdaıdaǵy eki el yntymaqtastyǵynyń aǵymdaǵy ahýaly taldanady. Eńbekte eki jaqty qarym-qatynastyń keleshegi týraly tujyrymdar aıtylyp, «Bir beldeý, bir joldy» birlesip salý yntymaqtastyǵynyń qos taraptyń damýyna ákelgen tereń ózgeristeri kórsetilgen.
Sondaı-aq «Halyq gazeti» basylymynda «Drondar túıe baǵyp júr» degen taqyrypta aqparat jarııalandy.
Qytaıdyń Shyńjań ólkesi Baıynǵolyn oblysyndaǵy shóldiń kindiginde baqtashylar 11 qarasha kúni 10 myń túıeni úıirden bólý jumysyna kiristi.
Qytaılyq BAQ-tyń keltirgen deregine súıensek, atalǵan óńirde 200-den astam túıege jergilikti malshylar spýtnıktik ornyn kórsetý chıpterin taǵyp, túıelerdi ártúrli topqa bólip, sıgnaldar arqyly naqty ýaqytynda olardyń jaıylyp júrgen ornyn dál bilip otyrady.
Sonymen qatar dron tehnologııasy da keńinen qoldanylyp, kóptegen malshy dron arqyly mal jaıýǵa kóshken.
Jergilikti baqtashynyń aıtýynsha, olar oısyl qara tuqymyn baǵýdy ońtaılandyrý úshin úıirdi bastaıtyn túıelerge júrgen ornyn kórsetý chıpterin taǵyp, olardy uıaly telefondaryna jelilik sıgnaldar arqyly qabyldaı alady. Sol arqyly malshylar úıinde jatyp-aq túıelerdiń qaıda jaıylyp júrgenin bile alady. Bul zamanaýı tásil mal baǵýdyń tıimdiligin aıtarlyqtaı jaqsartqan.
Túrik Memleketteri Uıymynyń estelik monetasy basyldy - TRT
Túrik Memleketteri Uıymy (TMT) úshin arnaıy ázirlengen estelik moneta múshe elder arasyndaǵy tereń tamyrly baılanystar men yntymaqtastyqty beıneleý maqsatynda daıyndaldy.
Bul týraly osy aptada Túrkııa Radıo Televızııa portaly habarlady.
Túrkııalyq basylymnyń málimetinshe, estelik monetany 6 qarasha kúni Qyrǵyzstannyń astanasy Bishkekte ótken TMT 11-shi sammıti barysynda prezıdent Rejep Taıyp Erdoǵan memleket basshylaryna syıǵa tartty.
Monetanyń bet jaǵynda TMT logotıpi jáne onyń aınalasynda segiz buryshty Seljýk juldyzy bar, al onyń buryshtary TMT qundylyqtaryn bildiredi.
Al artqy jaǵynda uıymǵa múshe elderdiń týlary men «Tilde, pikirde, iste birlik» degen sóz tirkesi jazylǵan. Estelik moneta qola metaldan basylyp, 900 lıradan satylymǵa shyǵaryldy. Monetadan 5 myń dana basylǵan.
Sonymen qatar osy aptada «TRT»-da «Bir bıletpen eki elge saıahat» degen aqparat ta jaryq kórgenin aıta ketken jón.
Budan buryn habarlanǵandaı, týrıster Túrkistannyń qos injý-marjany Qazaqstan men Ózbekstannyń mádenı oryndaryna bir ǵana poıyz bıletimen bara alady.
Aıta keteıik, Qazaqstannyń Týrızm jáne sport mınıstrligi týrısterge arnalǵan «Jibek joly» halyqaralyq poıyz sapary bastaǵalnyn habarlady. Alǵash ret júzege asyrylyp jatqan joba aıasynda týrıster Qazaqstan men Ózbekstannyń «Almaty-Túrkistan-Tashkent-Almaty» baǵyty boıynsha ornalasqan mádenı ortalyqtardy kóre alady.
Birinshi Jibek joly poıyzy 16 qarashada jolǵa shyǵady. Saıahat 4 kúnge sozylady. Osy sapardyń Qazaqstandaǵy bóliginde ejelgi Otyrar men Túrkistan qalalaryna, sondaı-aq qasıetti Arslan bab jáne Qoja Ahmet ıAsaýı kesenesine ekskýrsııalar uıymdastyrylady. Sonymen qatar týrıster Kerýen Saraı nysanyna bara alatyn bolady.
Týrdyń Ózbekstan bóliginde týrısterge Tashkenttiń tarıhı-mádenı ortalyqtary tanystyrylmaq.
Jańa energetıkalyq kólikterdiń jyldyq óndirisi alǵash ret 10 mıllıonnan asty - Jenmın jıbao
Qytaı avtomobıl óndirýshileri qaýymdastyǵynyń habarlaýynsha, Qytaıdyń jańa energetıkalyq kólikterdiń jyldyq óndirisi alǵash ret 10 mıllıon birlikten asty. Bul álemdegi eń joǵarǵy kórsetkish, dep habarlaıdy Qytaıdyń «Jenmın jıbao» aqparattyq portaly.
Statıstıka kórsetkendeı, 2013 jyl kólikter óndirisi men satylymy statıstıkalyq júıege engizilgen alǵashqy jyl boldy. 2018 jylǵa qaraı jyldyq ónim bir mıllıon danaǵa jetti, al 2022 jylǵa qaraı jyldyq ónim 5 mıllıonǵa jetken. Jyl bitýge áli bir jarym aı bar bolsada bıylǵy óndirilgen jańa energetıkalyq kólikter sany 10 mıllıon birlikten asyp tústi. Mamandar bul san jyl sońyna deıin 12 mıllıon kólikten asady dep boljap otyr.
Qytaılyq BAQ-tyń keltirgen derekterine súıensek, sońǵy on jyl ishinde elde ulttyq strategııalardyń basshylyǵymen júzge jýyq yntalandyrýshy saıasat engizilip, ónim tehnologııalary úzdiksiz jańartyldy jáne ınfraqurylymdyq qoldaý barǵan saıyn jaqsartyldy. Sonyń arqasynda Qytaıdyń jańa energetıkalyq kólik ónerkásibi alǵa jyljyp, naryqtandyrýdan ındýstrııalandyrýǵa, aýqymdylyqqa jáne jahandanýǵa deıin jáne odan da joǵary deńgeıge jetýdi jalǵastyrýda.
Bolashaqta Qytaıdyń jańa energetıkalyq kólik ónerkásibi kvanttyq sekiriske qol jetkizip qana qoımaı, sonymen qatar sapa salasyndaǵy serpilisterdi jalǵastyryp, Qytaıdyń jahandyq jańa energetıkalyq ónerkásibine úlken kúsh-qýat qospaq.
Ózbekstan men Qazaqstan bilim salasyndaǵy birlesken baǵdarlamalardy júzege asyrý múmkindikterin talqylaýda - ÓzA
Ózbekstan elshisi Bahtıer Ibragımov Qazaqstan bilim mınıstri Ǵanı Beısembaevpen kezdesip, eki eldiń bilim júıeleri arasyndaǵy yntymaqtastyqty nyǵaıtý máselelerin qarastyrdy, dep jazady Ózbekstannyń «ÓzA» aqparattyq portaly.
Atalǵan agenttiginiń habarlaýynsha, Qazaqstan bilim mınıstri Ózbekstan Prezıdentiniń eldiń bilim júıesine kórsetip otyrǵan joǵary nazaryn joǵary baǵalady.
Onyń aıtýynsha, ózbekstandyq oqýshylardyń halyqaralyq ǵylymı jáne sport olımpıadalarynda joǵary oryndarǵa ıe bolýy, júıede júzege asyrylyp jatqan tıimdi reformalardyń nátıjesi.
«Taraptar Tashkent, Astana jáne Almaty qalalaryndaǵy mamandandyrylǵan bilim mekemelerinde muǵalimder biliktiligin arttyrýdy uıymdastyrý, sondaı-aq zaman talabyna saı ádistemelik quraldar ázirleý arqyly eki el mektepterinde ózbek jáne qazaq tilderin oqytýdyń sapasyn arttyrý máselesin talqylady», dep jazady «ÓzA».
Kezdesý barysynda eki eldiń bilim mekemeleri arasyndaǵy ózara yntymaqtastyq baılanystaryn jandandyrý jáne keńeıtý, sondaı-aq birlesken sharalardy ótkizý múmkindikterine nazar aýdarylǵan.
BRIKS elderi jastarynyń múmkindikterin Halyqaralyq daǵdylar men ókilettikterdi arttyrý ortalyǵyn ashý arqyly tereńdetedi - ParsToday
Daǵdylar men múmkindikterdi keńeıtý ortalyǵy BRIKS-ke múshe elderdiń bilim berý jáne adam resýrstaryn oqytý salasyndaǵy kúsh-jigerin úılestirýge jaýapty bolady, dep habarlaıdy Irannyń «ParsToday» aqparat agenttigi.
Atalǵan agenttiktiń málimetinshe, BRICS+ halyqaralyq mektebi BRIKS bilim berý júıesin damytý úshin halyqaralyq daǵdylar men múmkindikterdi keńeıtý ortalyǵyn ashty.
ParsToday agenttiginiń «BRIKS halyqaralyq telejelisine» silteme jasap habarlaýynsha, bul joba Strategııalyq bastamalar agenttiginiń (ASI) qoldaýymen júzege asyrylýda jáne bul mekeme BRIKS bilim ortalyqtarynyń jelisin qurý jónindegi jahandyq bastamanyń bir bóligi bolýy kerek.
Bul ortalyqtyń negizgi mindeti BRIKS elderinde kásiptik baǵdar berý baǵdarlamalaryn, bilim berý, jastar saıasatyn jáne ekonomıka, ǵylym, bilim jáne memlekettik basqarý salalaryndaǵy bilim berý baǵdarlamalaryn qamtıtyn halyqaralyq bilim berý týrızmi júıesin damytý jáne iske qosý bolmaq. Sonymen qatar bilim berý týrızmin jumsaq kúsh quraldarynyń biri retinde paıdalanýǵa bolatyny aıtyldy.
Sonymen qatar osy aptada «ParsToday»-de «Altsgeımer aýrýynyń aldyn alý men emdeýge arnalǵan nano qospalar óndirýdegi ırandyq kompanııanyń jetistigi» degen taqyryptaǵy aqparat jaryq kórdi.
Aqparat derekterine súıensek, Irandyq ǵylymı kompanııanyń zertteýshileri Altsgeımer aýrýynyń aldyn alý úshin dárilik qospalar men teri jaralaryn qalpyna keltirýge arnalǵan jeke kremder shyǵarǵan.
Irannyń Ferdowsi Nanobiology ǵylymı negizdelgen kompanııasy nanotehnologııany qoldana otyryp, Altsgeımer aýrýynyń aldyn alý jáne emdeý úshin qosymsha dári shyǵardy. ParsToday málimetinshe, bul preparat quramynda «fenkol» jáne «kvertsetın» nanobólshekteri sııaqty tabıǵı ónimder bar.
Bul jeke kremdi daqtarǵa qarsy, bet terisin kóterý nemese teri tinin qalpyna keltirý úshin paıdalanýǵa bolady.
