Qytaıda sońǵy eki jylda 20 myńnan astam balabaqsha jabyldy
ASTANA. KAZINFORM – Qytaıda balabaqshalar sany jáne mektepke deıingi bilim alýshylar sany aıtarlyqtaı qysqardy. Bul týraly Tencent News agenttigi jazdy.
Qytaı Bilim mınıstrligi 10 qazan kúni jarııalaǵan «2023 jylǵy ulttyq bilim berý damýy týraly statıstıkalyq esepke» sáıkes, 2023 jyly elde 274 400 balabaqsha tirkelgen, bul aldyńǵy jylmen salystyrǵanda 14 808-ge azaıyp, 5,12%-dyq tómendeýdi kórsetedi. Sondaı-aq, mektepke deıingi bilim alýshylar sany 40,93 mıllıonǵa jetip, ótken jylmen salystyrǵanda 5,35 mıllıon balaǵa nemese 11,55%-ǵa qysqarǵan.
Tencent News agenttiginiń habarlaýynsha, Qytaıda balabaqshalar sany men mektepke deıingi bilim alýshylar sanynyń azaıýy 2023 jyly ǵana emes, odan erterek bastalǵany kórinedi.
«2022 jylǵy ulttyq bilim berý damýy týraly statıstıkalyq esep» derekterine sáıkes, 2022 jyly Qytaıda jalpy 289 200 balabaqsha bolǵan, bul aldyńǵy jylmen salystyrǵanda 5610 balabaqshaǵa az, ıaǵnı 1,90%-ǵa tómendegen. Mektepke deıingi bilim alýshylar sany 46,28 mıllıondy qurap, ótken jylmen salystyrǵanda 1,78 mıllıon balaǵa, ıaǵnı 3,70%-ǵa qysqarǵan.
Budan buryn Lianhe Zaobao saıtynyń habarlaýynsha, sońǵy jyldary Qytaıdaǵy týý deńgeıiniń tómendeýi balabaqshaǵa baratyn balalar sanynyń kúrt azaıýyna sebep bolǵan.
Tarıhı málimetterge súıensek, «eki bala» saıasaty engizilgennen keıin 2016 jáne 2017 jyldary týý kórsetkishi 17 mıllıonnan asty, ásirese 2016 jyly bul kórsetkish 18,83 mıllıonǵa jetti. Alaıda, 2018 jyly bul kórsetkish tómendeı bastady: sol jyly 15,23 mıllıon bala dúnıege kelse, 2019 jyly 14,65 mıllıon, 2020 jyly 12 mıllıon bala týyldy.
Sonymen qatar, 2021 jyly Qytaıda 10,62 mıllıon bala dúnıege kelse, 2022 jyly bul kórsetkish 9,56 mıllıondy, 2023 jyly 9,02 mıllıondy quraǵan. Bolashaqta balabaqshalarǵa qabyldaý kórsetkishteri tómendeı beredi dep boljanyp otyr.
Týý kórsetkishiniń tómendeýi óz kezeginde Qytaıdaǵy birqatar aýrýhanalardyń akýsherlik qyzmetine de áser etti.
Reuters agenttiginiń dereginshe, sońǵy eki aıda Chjetszıan jáne Tszıansı provıntsııalaryndaǵy birneshe aýrýhanalar akýsherlik bólimderdi jabylǵanyn málimdegen.
