Qytaıda sheteldik ınvestıtsııanyń naqty kólemi ótken eki aıda 20%-ǵa azaıdy

ASTANA. KAZINFORM - Qytaıdyń Saýda mınıstrligi jarııalaǵan qarjylyq esepke sáıkes, 2025 jyldyń qańtar-aqpan aılarynda Qytaıda sheteldik ınvestıtsııanyń naqty paıdalanylǵan quny 1712,1 mıllıard ıýanǵa kemip, ótken jyldyń sáıkes kezeńimen salystyrǵanda 20,4%-ǵa azaıǵan.

Belgili bolǵandaı, qańtar, aqpan aılarynda elde sheteldik ınvestıtsııanyń esebimen qurylǵan jańa kásiporyndardyń sany 7574-ke jetip, sáıkes mezgildegiden 5,8%-ǵa artqan.

Salalar boıynsha taratyp aıtar bolsaq:

• Óndiris sektoryna tartylǵan naqty sheteldik ınvestıtsııa – 478,2 mıllıard ıýan;

• Qyzmet kórsetý sektoryna tartylǵan sheteldik ınvestıtsııa – 1204,9 mıllıard ıýan;

• Joǵary tehnologııalyq sektorǵa tartylǵan sheteldik ınvestıtsııa – 524,9 mıllıard ıýan.

Osy rette, elektrondyq kommertsııa salasyndaǵy sheteldik ınvestıtsııa 33,5%-ǵa, bıofarmatsevtıka óndirisindegi sheteldik ınvestıtsııa 22,9%-ǵa, aqyldy turmystyq tehnıka óndirisindegi sheteldik ınvestıtsııa 40,7%-ǵa ósken.

Qarjylyq esepte kórsetilgendeı, Ulybrıtanııa, Germanııa jáne Ońtústik Koreıa elderinen qytaıǵa salynǵan ınvestıtsııanyń naqty quny sáıkesinshe 87,9%-ǵa, 54,7%-ǵa jáne 45,2%-ǵa ósken. Bul kórsetkishter erkin saýda aımaqtary arqyly salynǵan ınvestıtsııalardy da qamtıdy.

Qytaı Jańa ekonomıkalyq zertteýler ınstıtýtynyń dırektory Chjý Kelı sheteldik ınvestıtsııanyń naqty paıdalanylǵan qunynyń tómendeýin jahandyq ekonomıkalyq jaǵdaıdyń qubylýy, halyqaralyq kapıtal aǵynynyń ózgerýi jáne sheteldik kásiporyndardyń Qytaıǵa baǵyttalǵan ınvestıtsııalyq strategııalaryn retteýi sekildi faktorlarmen baılanystyrady. Ol Securities Daily basylymyna bergen suhbatynda, Qytaı sheteldik ınvestıtsııalardy kóbirek tartý úshin bıznes ortasyn odan ári jaqsartyp, sheteldik ınvestorlardyń senimin qaıta nyǵaıtýǵa qulshynýy qajet dep atap kórsetti.

Osyǵan deıin Qytaıda taǵy bir qala halqynyń sany 10 mıllıonnan asqany týraly jazdyq.