Qytaıda nóserli jańbyrdan jolaýshylar mingen eki ıahta aýdarylyp qaldy
ASTANA. KAZINFORM – Ońtústik-batys Qytaıdaǵy Gýeıchjoý provıntsııasynyń Tsıansı qalasyna qarasty Sınjen-Mıao ulttyq aýyldyq okrýginiń aýmaǵyndaǵy Lıýchýnhe ózeniniń Dýnfen sý qoımasyna taıaý bóliginde jolaýshylar otyrǵan ıahtalar aýdarylyp, 70-teı adam sýǵa ketken. Bul týraly Sınhýa agenttigi habarlady.
Jergilikti ýaqyt boıynsha 4 mamyr kúni tústen keıin saǵat 4 shamasynda Ýtszıan ózeniniń joǵarǵy aǵysynda ornalasqan Lıýchýnhe ózeninde nóser jaýyp, sý aıdynynda júzip júrgen eki ıahta aýdarylyp qalǵan.
Belgili bolǵandaı, apattan ekıpaj múshelerin qosqanda shamamen 70 adam sýǵa qulaǵan. Qytaılyq agenttiktiń jazýynsha, saǵat 19:00-degi jaǵdaı boıynsha 50-den astam adam sýdan shyǵarylǵan. Qazirgi tańda oqıǵa ornynda qutqarý jumystary júrgizilip jatyr.
Buǵan deıin Qytaıdyń Tszıansý provıntsııasynyń Sýchjoý qalasynda tikushaq apatqa ushyrap, jerdegi bir adam qaza tapqanyn jazǵan edik.