Qytaıda masa arqyly taralatyn qaýipti vırýstyń órshýi baıqaldy

ASTANA. KAZINFORM — Qytaıdyń ońtústiginde chıkýngýnıa qyzbasynyń órshýi tirkeldi, dep habarlaıdy Sınhýa.

Foshan qalasynda chıkýngýnıa qyzbasy tirkelip, ol syrttan ákelingen jaǵdaıdan keıin jergilikti deńgeıde tarala bastady. Aýdandyq densaýlyq saqtaý basqarmasynyń málimetinshe, alǵashqy jaǵdaı 8 shildede anyqtalǵan. 15 shildedegi jaǵdaı boıynsha, 478 rastalǵan jaǵdaı tirkelgen, olardyń barlyǵy jeńil túrdegi aýrýǵa jatady. Negizgi juqtyrý oshaqtary – Letsýn, Beıtszıao jáne Chentsýn eldi mekenderi.

Habarlamada aıtylǵandaı, chıkýngýnıa qyzbasy — Aedes masalary arqyly taralatyn jiti vırýstyq aýrý. Onyń basty belgileri – joǵary dene qyzýy, bórtpe jáne býyndardyń aýyrýy. Aýrýdyń klınıkalyq kórinisi denge qyzbasyna uqsas bolyp keledi.

Ystyq ári ylǵaldy aýa raıynda aýrý tasymaldaýshy masalardyń belsendiligi artyp, denge men chıkýngýnıa sııaqty jándikter arqyly beriletin aýrýlardyń taralý qaýpi joǵarylaıdy.

Sarapshylar turǵyndarǵa masalardyń kóbeıýine jol bermeý úshin ashyq ydystaǵy sýdy tógip, konteınerlerdi tazalap turýǵa jáne arnaıy qorǵaný quraldaryn qoldanýǵa keńes beredi. Aýrý belgileri baıqalǵan jaǵdaıda dárigerge júginip, jándik shaqqanyn nemese sońǵy saparlar týraly habarlaý qajet.

Buǵan deıin Kolýmbııa sary bezgektiń órshýine baılanysty tótenshe jaǵdaı jarııalaǵanyn jazǵanbyz.