Qytaıda lıtıı keniniń iri qory tabyldy

ASTANA. KAZINFORM —  Hýnan provıntsııasynda Qytaıdaǵy eń iri lıtıı ken oryndarynyń biri anyqtaldy. Bul týraly Kazinform agenttigi óńirdiń Jer resýrstary departamentine silteme jasap habarlaıdy. 

Hýnan provıntsııasyndaǵy Lıný ýeziniń Tszıtszıaoshan taý massıvinde júrgizilgen geologııalyq barlaý jumystary nátıjesinde kólemi 490 mıllıon tonna bolatyn lıtıı keni anyqtaldy. Bul kendegi lıtıı totyǵynyń kólemi 1,31 mıllıon tonna dep baǵalanyp otyr.

Atalǵan ken orny rýbıdıı, volfram jáne qalaıy syndy strategııalyq mańyzdy ilespe elementterge de baı. Barlyq anyqtalǵan resýrstar buryn memlekettik qor esebine engizilmegen.

Joba jetekshisi Chen Chjıtsıannyń aıtýynsha, bul joly taýly aımaqta aýyr burǵylaý jabdyqtaryn aýyr salmaqty ushqyshsyz ushý apparattary arqyly jetkizý tehnologııasy alǵash ret qoldanylyp, jumystyń tıimdiligi aıtarlyqtaı artqan.

Hýnan provıntsııasy Mıneraldyq resýrstar ınstıtýtynyń professory Sıýı Imınniń aıtýynsha, bul lıtıı ken ornynyń ashylýy Chenchjoý qalalyq okrýginde jańa energııa kózderine arnalǵan óndiristik baza qurý úshin myqty resýrstyq negiz qalaıdy.

Qazirgi tańda lıtıı — elektromobılder, smartfondar, noýtbýkter jáne basqa da qurylǵylarda qoldanylatyn lıtıı-ıondy akkýmýlıatorlardy óndirýde negizgi metaldardyń biri sanalady. Sońǵy málimetterge sáıkes, Qytaıdyń rastalǵan lıtıı qory jahandyq kólemniń 16,5%-yn quraıdy. Bul kórsetkish boıynsha Qytaı álemde ekinshi orynda tur.

Buǵan deıin sarapshylar men treıderler lıtıı baǵasy eki jyldyq kúrt tómendeýden keıin turaqtana bastaıdy dep boljaǵan bolatyn.

Aıta ketelik Qytaı áskerı tehnıkasyn eksporttaýǵa nıetti ekenin bildirdi.