Qytaıda kópir qulap, júrgizýshi júk kóliginde ilinip qaldy
ASTANA. KAZINFORM — Qytaıdyń Gýıchjoý provıntsııasynda tasjol kópiri qulap, júk kóliginiń júrgizýshisi qıraǵan kópirde ilýli turǵan kólik kabınasynda qalyp qoıdy.
Qytaıdyń «Ludjýn Chenbao» basylymynyń habarlaýynsha, 2025 jylǵy 24 maýsymda saǵat 07:40 shamasynda Gýıchjoý provıntsııasynyń Sandý aýdanyndaǵy G76 tasjolynyń Hoýchjyhe kópiriniń kireberis bóligi qulady. Onyń qulaýyna úzdiksiz jaýǵan qatty jańbyrdan týyndaǵan taý jynystarynyń syrǵýy sebep bolǵan. Oqıǵa kezinde kópirde bir qyzyl júk kóligi boldy, onyń aldyńǵy bóligi aýada ilýli turyp, júrgizýshi kabınada qalyp qoıdy.
Qytaıdyń «Ludjýn Chenbao» basylymy men Gýıchjoý provıntsııasynyń kólik basqarmasynyń málimetteri boıynsha, órt sóndirýshiler júrgizýshini aman-esen qutqarǵan, oqıǵa ornynda qaza bolǵandar nemese jaraqat alǵandar joq.
Kópir astynda jaqyn mańdaǵy aýyldarǵa tıesili qurylys jumystaryna arnalǵan úsh kólik bolǵany anyqtaldy, biraq dronmen tekserý nátıjesinde kólikterdiń ishinde eshkim bolmaǵany rastaldy.
Oqıǵadan buryn, 24 maýsymda saǵat 05:51–de kólik basqarmasy qyzmetkerleri kópirdiń deformatsııasyn baıqap, joldyń joǵary baǵytyn dereý jaýyp tastady. Saǵat 07:11–de joldyń eki baǵytyna da ýaqytsha shekteý engizildi. Tótenshe jaǵdaılar, polıtsııa jáne kólik basqarmasynyń qyzmetkerleri oqıǵa ornyna jedel jetip, qutqarý jumystaryn úılestirip, aınalma joldardy uıymdastyryp jatyr. Kópirdiń qulaý sebebi qazir tergelip jatyr.
Budan buryn Úndistannyń Maharashtra shtatynyń Pýna qalasynda kópir opyrylyp, tórt týrıst qaza tapty.