Qytaıda qazaqstandyq fılmniń túsirilimi bastaldy - Sheteldegi qazaq baspasózi
Kazinform sheteldegi qazaq tilinde taraıtyn aqparat kózderine aptalyq sholýyn usynady.
Túrkııanyń medıtsına týrızmi damyp keledi - TRT
Ótken jyly Túrkııaǵa saýyqtyrý týrızmi úshin shamamen 1 mıllıon 400 myń adam keldi. Túrkııa densaýlyq týrızminiń ortalyq eline aınaldy, dep jazady Túrkııa Radıo Televızııa portaly.
Atalǵan BAQ-tyń dereginshe, Saýda mınıstrliginiń áleýmettik medıa akkaýntynda jasalǵan málimdemege qaraǵanda Túrkııa medıtsınalyq týrızm tańdaýy boıynsha elder arasynda jetinshi orynda tur.
2023 jyly Túrkııaǵa saýyqtyrý týrızmi úshin shamamen 1 mıllıon 400 myń adam kelip, densaýlyq saqtaý salasynyń qyzmet eksporty 2 mıllıard 300 mıllıon dollarǵa jetken.
Ótken jyly mınıstrlik densaýlyq saqtaý qyzmetteriniń eksportynda jumys isteıtin kompanııalarǵa qoldaý kórsetýdi arttyrǵan. Olarǵa 733 mıllıon lıra qoldaý kórsetilgen.
Quljadan Almatyǵa ushaq qatynady – «Halyq gazeti»
15 sáýirde China Southern Airlines avıakompanııasynyń Quljadan Almatyǵa alǵashqy halyqaralyq reısi 86 jolýshysymen Qazaqstannyń Almaty halyqaralyq áýejaıyna qondy, dep habarlaıdy Qytaıdyń «Halyq gazeti».
Atalǵan basylymnyń keltirgen málimetine súıensek, Qulja-Almaty aralyǵyndaǵy halyqaralyq reıs aptasyna bir ret baryp keledi. Ushaq shamamen 1 saǵat 20 mınýt ushady. Sol kúni Qulja áýejaıynda ushý-qoný jolaǵyndaǵy alǵashqy reısti merekeleý rásimi ótken.
«Quljadan Almatyǵa alǵashqy reısti azamattyq avıatsııa salasy joǵarǵy iltıpatpen «sý qaqpasynan ótý» rásimimen qarsy aldy», dep jazady qytaılyq BAQ.
Sonymen qatar kaz.people.cn-de «Qazaqstannyń Qytaıdaǵy Elshisi: 2023 jyly Qazaqstan men Qytaı arasyndaǵy saýda kólemi 30%-ǵa artty» degen taqyryptaǵy aqparat jaryq kórdi.
Qytaılyq basylymnyń málimetinshe, 2023 jyly Qazaqstan men Qytaı arasyndaǵy saýda kólemi 30%-ǵa ósip, 41 mıllıard AQSh dollaryn quraıtyn jańa tarıhı rekordqa jetti (QHR bas keden basqarmasynyń málimeti boıynsha). Qazaqstannyń Qytaıdaǵy elshisi Shahrat Nuryshev eki taraptyń aldynda mańyzdy mindetter turǵanyn aıtty.
«Geografııalyq ornalasýyna baılanysty Qazaqstan Azııadaǵy tranzıttik tasymaldaýda sheshýshi ról atqarady. Qazirgi ýaqytta «Bir beldeý, bir jol» bastamasyn iske asyrý aıasynda Qytaı men Eýropa arasyndaǵy temirjol tasymalynyń 80%-dan astamy Qazaqstan arqyly ótedi.
2023 jyly eki el arasyndaǵy temirjol tasymalynyń kólemi sáıkes mezgilmen salystyrǵanda 22%-ǵa artyp, 28,3 mln tonnaǵa jetti», dep jazǵan «Halyq gazeti».
QazUÝ-da Saǵdı kúnine arnalǵan ádebı kesh ótti - Parstoday
Ál-Farabı atyndaǵyQazUÝShyǵystaný faýltetinniń Taıaý Shyǵys jáne Ońtústik Azııa kafedrasy ırantaný bóliminiń uıymdastyrýymen 18 sáýirde Saǵdı kúnine arnalǵan ádebı kesh ótti.
Bul týraly osy aptada Irannyń «Parstoday» aqparat agenttigi habarlady.
Atalǵan basylymnyń keltirgen málimetine súıensek, ádebı keshtiń maqsaty – parsy ádebıetiniń beldi ókilderiniń biri, uly aqyn Saǵdı Shırazıdyń shyǵarmashylyǵy jóninde pikir almasý, onyń ádebı murasyn nasıhattaý. Keshke qatysýshy qonaqtar parsy tilinde aqyn shyǵarmalarynan óleń oqydy. Ádebı keshte shyǵystaný fakýltetiniń dekany Natalıa Em, Almaty qalasyndaǵy Iran Islam Respýblıkasy Bas konsýly Mohsen Faǵanı, Tájikstan Respýblıkasynyń Almaty qalasyndaǵy Bas konsýly Ravshan Bobohonzoda, Turan-Iran ǵylymı-zertteý ortalyǵynyń dırektory Islam Jemeneı qatarly birqatar arnaıy shaqyrylǵan mamandar sóz sóıledi.
Sondaı-aq, sharada baıandamashylar Caǵdı Shırazıdyń shyǵarmashylyǵyna jan-jaqty toqtalyp, onyń qundy jaqtaryna aıryqsha kóńil bóldi. Sonaý 13-ǵasyrda jazylǵan qýatty aforızmderi ǵasyrdan-ǵasyrǵa, urpaqtan-urpaqqa tarap otyrǵanyn jáne onyń shyǵarmalarynyń bıik adamgershilik rýhta jazylǵanyn, shyǵarmalaryndaǵy sóz ıirimderiniń sheber berilýi, nasıhat pen ǵıbratqa tolylyǵy, tipti olardyń qanshama ýaqyt zymyrap ótse de, bolashaq urpaq úshin qunyn joǵaltpaǵanyn atap ótti. Sonymen qatar keshke qatysýshy qonaqtar aqyn shyǵarmashylyǵynyń álem ádebıetine qosqan úlesi, qazaq tilindegi aýdarmalary men jańa zertteý jumystarymen oı bólisti.
Tashkentte Ózbekstan men Qazaqstan arasyndaǵy konsýldyq-quqyqtyq máseleler boıynsha konsýltatsııalar ótti - «ÓzA»
Tashkent qalasynda Ózbekstan men Qazaqstannyń syrtqy ister mınıstrlikteri arasynda konsýldyq-quqyqtyq máseleler boıynsha konsýltatsııalar ótti.
Bul týraly ózbekstandyq «ÓzA» aqparattyq agenttigi habarlady.
Ózbekstandyq BAQ-tyń deregine súıensek, Syrtqy ister mınıstrliginiń málimetinshe, konsýltatsııalarǵa eki eldiń syrtqy ister mınıstrlikteriniń konsýldyq qyzmetteri men quqyq qorǵaý organdarynyń ókilderi qatysqan.
«Іs-sharada konsýldyq ister salasyndaǵy Ózbekstan-Qazaqstan yntymaqtastyǵyn damytý, sondaı-aq azamattardyń quqyqtary men múddelerin qorǵaý máseleleri talqylanyp, osy baǵyttar boıynsha birlesken jobalardy júzege asyrý boıynsha usynystar qaraldy», delingen habarlamada.
Kelissózder qorytyndysy boıynsha hattamaǵa qol qoıylǵan.
Sondaı-aq «ÓzA»-da «Ózbekstan Qazaqstanǵa gýmanıtarlyq kómek jiberdi» degen taqyryptaǵy aqparat jarııalandy.
Ózbekstan Prezıdenti Shavkat Mırzıeevtiń tapsyrmasyna sáıkes Qazaqstandaǵy sý tasqynynan zardap shekken halyqqa gýmanıtarlyq kómek jóneltilgen.
Gýmanıtarlyq júkti qalyptastyrýǵa jáne belgilengen jerge jetkizýge baılanysty uıymdastyrý máselelerine basa nazar aýdarylǵan Mınıstrler Kabınetiniń qaýlysy qabyldanǵan.
Osynaý gýmanıtarlyq júkti Qazaqstan Respýblıkasyna Ózbekstan Prezıdentiniń keńesshisi Tursynhan Hýdoıbergenov bastaǵan jumys toby jetkizedi.
Ózbekstandyq basylymnyń dereginishe, 15 iri júk kóligine tıelgen gýmanıtarlyq kómek quramynda azyq-túlik, áıelder, balalar jáne erler syrtqy kıimderi, kórpe-tósek, jastyq, gıgıenalyq quraldar, arnaıy jabdyqtary bar shatyrlar, rezeńke qaıyq jınaqtary jáne basqa da qajetti taýarlar bar.
Qytaıda qazaqstandyq fılmniń túsirilimi bastaldy – People.cn
Chjetszıannyń Hendıany qazaqstandyq fılm túsirýshilerdi qarsy aldy.
Birneshe kúnnen beri, Chjetszıan ólkesi Tszınhýa qalasy men Dýnıan qalasynda ornalasqan Hendıan kıno jáne televıdenıe qalashyǵynda qazaqstandyq «Eń bolmaǵanda kınoda» (Hotıa by v kıno) fılminiń túsirilim toby túsirilimmen aınalysyp jatyr. Hengdian Film and Television Crew Service kompanııasynyń jaýapty tulǵasynyń aıtýynsha, bul Hendıannyń Qazaqstannan qabyldaǵan alǵashqy fılm túsirý toby, dep habarlaıdy Qytaıdyń «Halyq» gazeti.
«Eń bolmaǵanda kınoda» fılminiń qytaılyq prodıýseri Van Sıaopın munyń komedııalyq serıal ekenin aıtqan. Qazirgi ýaqytta túsirilim toby úshinshi bólimdi túsirip jatyr, negizgi mazmuny - bas keıipkerdiń anasynyń aýrýyna baılanysty Qytaıǵa qytaı medıtsınasyn izdep kelip, qytaılyq kýng-fýdy úırengeni baıandalady.
«Halyq» gazetiniń keltirgen deregine súıensek, Chjetszıannyń ortalyǵynda ornalasqan Hendıan kıno jáne teledıdar ındýstrııasynyń salystyrmaly túrde tolyq ekologııalyq tizbegin qurǵan. Qytaıdyń kıno jáne teledıdar jumystarynyń úshten ekisi osy jerden shyǵady. Munda 1 900-den astam kınokompanııa men telekompanııa ornalasqan, osy ýaqytqa deıin 4 000-nan astam kıno túsirý toptaryn qabyldady. Munda kún saıyn ondaǵan myń belsendi jumys jasap jatqan qyzmetkerler bar.
