Qytaıda «Qazaq halqynyń myń kúıi» atty kitaptyń tusaýkeseri ótti – sheteldegi qazaq baspasózi
Kazinform agenttigi sheteldegi qazaq tilinde taraıtyn aqparat kózderine aptalyq sholýyn usynady.
Qytaıda «Qazaq halqynyń myń kúıi» atty kitaptyń tusaýkeseri ótti – ukilialtay
4 qarasha kúni «Qazaq halqynyń myń kúıi» atty kúı kitabynyń tusaýkeseri ótti. Atalǵan basqosý Altaı aımaqtyq Mádenıet-sport, radıo-televızııa jáne saıahat mekemesinde ótkizildi, dep habarlaıdy Qytaıdyń ukilialtay aqparattyq portaly.
«Qazaq halqynyń myń kúıi» atty kúı kitabynyń shyǵýyna aımaqtyq ákimshilik mekemesi, aımaqtyq úgit bólimi, aımaqtyq mádenıet jáne saıahat mekemesi qatarly resmı organdar demeýshilik kórsetken.
Atalǵan kitaptyń avtory Altaı aımaqtyq án-bı úıirmesiniń burynǵy basshysy, memlekettik 1-shi dárejeli kompozıtor Qabylaldy Abdollauly.
Avtor 2017 jyldan bastap «Qazaq halqynyń myń kúıi» atty kitap jóninde izdenis jasap, rettep, jınaý jumysyna kirisken. Q.Abdollauly jan-jaqty jumys isteý arqyly sońynda kúı kitabyn resmı baspadan shyǵaryp taratý múmkindigine ıe bolǵan.
«Osy kúı kitabynyń baspadan shyǵyp taratylýy – qazaq ultynyń halyqtyq ánderi men aspaptyq kúılerin jalǵastyrý, damytý ǵana emes, onan da mańyzdysy adamdarǵa ónerdi, mádenıetti tanytýǵa umtylý. Sondaı-aq mundaı kúı kitabynyń shyǵýy ulttyq mýzyka mádenıetin zertteýdiń ilgerlep kele jatqanyn kórsetedi», - deıdi qytaılyq basylym.
Túrkııa uly kósemderin ulyqtady – «TRT»
Uly kósemdi taǵy bir ret qurmetpen eske alamyz. Túrkııa Respýblıkasynyń negizin qalaýshy jáne tuńǵysh prezıdent Mustafa Kemal Atatúriktiń qaıtys bolǵanyna 85 jyl toldy. Biz ony súıispenshilikpen jáne qurmetpen eske alamyz, dep habarlaıdy Túrkııa Radıo Televızııa portaly habarlady.
Atalǵan basylymnyń keltirgen málimetine súıensek, Mustafa Kemal Birinshi Dúnıejúzilik soǵystyń nátıjesinde Osmanly ımperııasyn «jeńiliske ushyrady» dep eseptep, otan topyraǵyn jeńimpaz elder jaýlap ala bastaǵan kezde túrik ultyna kóshbasshylyq jasap, táýelsizdik kúresin júrgizgen.
«Bul kúres tabyspen aıaqtalǵan soń Lozannada qabyldanǵan Beıbitshilik kelisimi nátıjesinde Túrkııa Respýblıkasy quryldy jáne Mustafa Kemal tuńǵysh prezıdent bolyp saılandy. Artynan «Atatúrik» tegin alǵan kóshbasshy ózi bastap júzege asyrǵan reformalarymen zamanaýı bir qoǵamnyń qurylýyna úlken úles qosty. Uly kósemin taǵy bir ret qurmetpen eske alamyz», - dep túıindeıdi túrkııalyq BAQ.
Sonymen qatar osy aptada «TRT»-da «Túrkııa Aıǵa kólik jiberedi» degen taqyryptaǵy aqparat jarııalandy.
Atalǵan basylymnyń dereginshe, Túrkııanyń Ulttyq Ǵarysh baǵdarlamasy aıasynda bastaǵan, Aıdy zertteý jumysyn júzege asyrý úshin jetildirilgen alǵashqy ǵarysh kóligi 2026 jylǵa qaraı aıaqtalyp, ǵaryshqa ushyrylady.
Bul mańyzdy jobada Túrkııa Ǵylymı jáne tehnıkalyq zertteý mekemesi «TÜBİTAK», Ónerkásip jáne tehnologııa mınıstrligi men Túrkııa Ǵarysh agenttigi tarapynan daıyndalǵan Ulttyq ǵarysh baǵdarlamasy aıasynda Túrkııanyń 10 jyldyq jospar men maqsattary aıqyndalǵan. Osylaısha Túrkııanyń Aı zertteýlerimen tanylatyn elder qataryna qosylýy maqsat etildi.
«Qorǵas» erkin saýda ortalyǵynda qazaqstandyq bank ashyldy – «Halyq gazeti»
Qytaılyq BAQ-tyń dereginshe, 3 qarashada Qazaqstannyń Ortalyq nesıe Banki Shyńjań erkin saýda aımaǵynyń Qorǵas aýdanyndaǵy «Qorǵas» Qytaı-Qazaqstan Halyqaralyq shekara yntymaqtastyǵy ortalyǵyna resmı túrde ornalasty. Bul Shyńjańnyń erkin saýda aımaǵy qurylǵannan keıin osynda ashylǵan alǵashqy sheteldik bank, dep habarlaıdy Qytaıdyń «Halyq gazeti».
«Qazaqstannyń Ortalyq nesıe Banki – Qazaqstanda qurylǵan alǵashqy kommertsııalyq bankterdiń biri. Qytaıda jáne Qazaqstanda jergilikti valıýtada ekijaqty esep aıyrysýdy jáne klırıngti, qolma-qol aqshaǵa qol jetkizýdi, transshekaralyq aýdarymdar men negizgi halyqaralyq valıýtalarda transshekaralyq esep aıyrysýlardy jáne t.b. júzege asyrady. Qytaı men Qazaqstannyń saýdagerleri men turǵyndaryna neǵurlym keshendi transshekaralyq qarjy qyzmetterin usynady», - dep jazady qytaılyq BAQ.
«Halyq gazeti» aqparattyq portalynyń dereginshe, Qazaqstandyq banktiń kelýi eki eldiń jergilikti valıýtalarynyń aınalys jaǵdaıyn odan ári jaqsarta alady. Sonymen qatar bul ıýandy ınternatsıonaldandyrý protsesin jedeldetýge jáne Qytaı men Qazaqstan bankteri arasyndaǵy qarjylyq yntymaqtastyq arqyly kapıtaldyń ártúrli túrlerin jumyldyra alady.
Túrki tilder aqparat agenttikteriniń alıansy quryldy – «ÓzA»
Ystambul qalasynda «BAQ-taǵy birlik jáne bolashaqqa kózqaras» taqyrybynda Túrkitildes elderdiń medıa sammıti ótti.
Іs-sharada Túrkııanyń «Anadolý» aqparat agenttiginiń bas dırektory Serdar Karagez, Qyrǵyzstannyń «Kabar» aqparat agenttiginiń dırektory Mederbek Shermetalıev, Qazaqstan «Qazkontent» medıaholdınginiń basqarma tóraǵasy Bekzat Júsipov, Ózbekstan Ulttyq aqparat agenttiginiń (UzA) bas dırektory Abdýsaıd Kýchımov, sondaı-aq Túrkııa Prezıdenti ákimshiliginiń baılanys bóliminiń meńgerýshisi Fahrettın Altýn, Túrki memleketteri uıymynyń Bas hatshysy Kýbanıchbek Omýralıev jáne basqa da joǵary mártebeli qonaqtar qatysty.
Bul týraly osy aptada ózbekstandyq «ÓzA» aqparattyq agenttigi habarlady.
Atalǵan BAQ-tyń málimetinshe, is-sharaǵa qatysýshylar Túrkitildes elderdiń jetekshi medıa qurylymdarynyń ózara aqparat almasýdaǵy yntymaqtastyǵynyń mańyzyn erekshe atap ótken.
«Osyǵan sáıkes, alıans túrki áleminiń ortaq murasy men mádenıetin saqtaý men nasıhattaýda mańyzdy ról atqaratyny sóz boldy. Sammıt sońynda bes eldiń medıa qurylymdarynyń basshylary arasynda Túrki tilder aqparat agenttikteriniń alıansyn qurý týraly deklaratsııaǵa qol qoıylǵanyn málimdeıdi», - dep jazdy ózbekstandyq basylym.
Sondaı-aq osy aptada «ÓzA» aqparattyq agenttiginde «Ortalyq Azııa ónerkásiptik kooperatsııasynyń halyqaralyq ortalyǵy iske qosylady» degen taqyryptaǵy aqparat jarııalandy.
Ózbekstandyq basylymnyń dereginshe, Tashkentte ótip jatqan Ekonomıkalyq yntymaqtastyq uıymynyń 16-shy sammıti aıasynda Qazaqstan Respýblıkasy men Ózbekstan Respýblıkasynyń Úkimeti arasyndaǵy Ortalyq Azııanyń ónerkásiptik yntymaqtastyǵy halyqaralyq ortalyǵynyń qyzmetin retteý týraly kelisim kúshine endi.
Qujatqa Ózbekstannan Investıtsııalar, ındýstrııa jáne saýda mınıstri Lazız Qýdratov jáne Qazaqstannan Saýda jáne ıntegratsııa mınıstri Arman Shaqqalıev qol qoıǵan.
«ÓzA»-nyń keltirgen málimetine súıensek, ortalyqqa memleketaralyq kooperatsııa men halyqaralyq kún tizbegin damytý úshin qolaıly jaǵdaı jasaý, shekaralas óńirdiń óndiristik bazasyn paıdalaný tıimdiligin arttyrý, óndiristik úderisti úılestirý, ónerkásiptik kásiporyndardy jańǵyrtý jáne básekege qabilettiligin arttyrý, eki el arasynda ónerkásiptik kooperatsııany keńeıtý jáne ımportty almastyratyn ónimderdi damytý sııaqty mańyzdy mindetter júktelgen.
190 mıllıon jyl burynǵy dınozavr jumyrtqasynyń uıasy tabyldy – «Jenmın Jıbao»
«Qytaı geologııalyq ýnıversıtetiniń (Ýhan), Qytaı ǵylym akademııasy ejelgi omyrtqalylardy jáne ejelgi adamzatty zertteý basqarmasy men Gýıchjoý ólkelik murajaı qatarly oryndardyń zertteýshileri Gýıchjoý ólkesi Anshýn qalasy Pıńba raıonynan 190 mıllıon jyl burynǵy ózgeshe saqtalǵan dınozavrdyń tasqa aınalǵan qaldyqtarynyń shoǵyryn baıqaǵan. Dınozavrdyń tasqa aınalǵan qaldyqtarynyń toby keminde úsh dınozavr men bes uıadaǵy balapanǵa aınala bastaǵan jumyrtqalar sany shamamen 50. Bulardyń barlyǵy bir túrdegi dınozavrge jatady», - dep habarlaıdy qytaılyq «Jenmın Jıbao» basylymy.
Bul – Qytaıdan tabylǵan eń ejelgi dınozavr jumyrtqasy. Sonymen birge, dúnıe júzi boıynsha qazirge deıin baıqalǵan eń ertedegi dınozavr jumyrtqasy men jetilgen dınozavrdyń tasqa aınalǵan qaldyqtarynyń shoǵyry sanalady. Bul týraly zertteý nátıjesi «Memlekettik ǵylymı sholý» jýrnalynyń ınternet paraqshasynda jarııalanǵan.
Aıta keteıik, Gýıchjoýdaǵy Pınba qalasynda tabylǵan dınozavrdyń tasqa aınalǵan qaldyǵy kúreń qyzyl tústi shaǵyldy taý jynysynan baıqalǵan. Bul dınozavrlar – 190 mıllıon jyldyń aldyndaǵy ıýra dáýiriniń basynda ómir súrgen, eki aıaǵymen júretin dınozavr.
