Qytaıda ǵaryshty zertteý jónindegi halyqaralyq qaýymdastyq jumys isteı bastady

ASTANA. KAZINFORM – Qytaıdyń shyǵysyndaǵy Anhoı provıntsııasyna qarasty Heıfeı qalasynda Ǵaryshty zertteý jónindegi halyqaralyq qaýymdastyq (IDSEA) jumysyn bastady, dep habarlaıdy Sınhýa.

Bul Qytaı Halyq Respýblıkasyndaǵy alys ǵaryshty zertteýge mamandanǵan alǵashqy halyqaralyq ǵylymı uıym. Qaýymdastyq tóraǵasy retinde Qytaıdyń Aı baǵdarlamasynyń bas konstrýktory ári Qytaı Injenerlik akademııasynyń akademıgi Ý Veıjen saılandy.

- IDSEA mekemesi Qytaı úshin halyqaralyq dárejede tájirıbe almasýǵa jáne yntymaqtastyq úshin zor mańyzǵa ıe jáne ol álemdik ǵarysh qaýymdastyǵynyń birlesken ınnovatsııalarynyń sımvoly ispettes,-dedi ol.

Azııa-Tynyq muhıty ǵaryshtyq yntymaqtastyq uıymynyń (APSCO) bas hatshysy Tszıan Hýeı óz kezeginde qaýymdastyqtyń qurylýy damýshy elderdiń alys ǵaryshty zertteý isine qatysýyna jańa múmkindikter ashqanyn atap ótti.

Ol sondaı-aq APSCO uıymynyń IDSEA qaýymdastyǵymen iri halyqaralyq jobalardy júzege asyrý men áleýetin arttyrýǵa baǵyttalǵan ózara yntymaqtastyqtyń ınnovatsııalyq úlgisin qalyptastyrýdy kózdep otyrǵanyn jetkizdi.

Qaýymdastyqtyń qurylýy Hefeı qalasyndaǵy Alys ǵaryshty zertteý zerthanasynyń, Qytaıdyń Ulttyq ǵarysh basqarmasyna qarasty Aı jáne ǵarysh baǵdarlamalary ortalyǵynyń, Qytaı astronavtıka qoǵamynyń, Qytaı ǵaryshtyq zertteýler qoǵamynyń, sondaı-aq Frantsııanyń Horizon 2061 baǵdarlamasynyń birlesken kúsh-jigeriniń nátıjesi. Bul bastamany Qytaıdan 20 akademık jáne shetelden 31 ǵalym qoldady.

Osyǵan deıin Qytaı bıliginiń jas jubaılardy bala súıýge yntalandyrýǵa baǵyttalǵan aqshalaı járdemaqy júıesin engizýdi kózdep otyrǵany týraly jazdyq.